Grupi parlamentar i PD kallëzon në SPAK kryeministrin Rama dhe ministrin Gonxhja për financimin e koncertit të Kanye West

Grupi parlamentar i Partisë Demokratike ka depozituar në SPAK një kallëzim penal ndaj kryeministrit Edi Rama dhe ministrit të Turizmit, Kulturës dhe Sportit, Blendi Gonxhja, lidhur me financimin prej 4.2 milionë eurosh për koncertin e artistit Kanye West në Tiranë.

PD i akuzon Ramën dhe Gonxhen për veprat penale “Shpërdorimi i detyrës” dhe “Shkelja e barazisë së pjesëmarrësve në tendera apo ankande publike”.

Sipas kallëzimit, financimi prej 400 milionë lekësh është miratuar përmes një akti normativ të Këshillit të Ministrave, me propozim të ministrit Gonxhja, për mbështetjen e organizimit të aktivitetit kulturor-artistik.

Partia Demokratike pretendon se përdorimi i fondit rezervë të Buxhetit të Shtetit për këtë aktivitet nuk është në përputhje me ligjin dhe se vendimi ka cenuar parimet e konkurrencës së lirë mes operatorëve ekonomikë.

Në kallëzim thuhet se fondi rezervë duhet të përdoret për situata të paparashikuara dhe jo për aktivitete të planifikuara, duke pretenduar se në këtë rast janë krijuar avantazhe për një operator privat.