Historia e Elversberg, skuadra e qytetit me 13 mijë banorë sfidon Bayernin e Mynihut në Bundesligë

Elversberg, skuadër debutuese në Bundesligë, do të përballet sot me gjigantët e Bayernit të Mynihut në kampionat.

Elversberg, një bashki në jug të Saarlandit me vetëm 13.000 banorë, është qyteti më i vogël që ka pritur ndonjëherë një ekip të Bundesligës. Duke qenë se nuk ka as stacion treni dhe as qendër komunitare, qyteti njihet si “Dorfverein” – ose “klub fshati”.

I themeluar në vitin 1907, i shpërbërë gjatë Luftës së Parë Botërore dhe i rivendosur në vitin 1918, klubi funksionoi si një ekip amator për pjesën më të madhe të shekullit të 20-të.

Megjithatë, situata ndryshoi në fillim të viteve 2000, kur kompania vendase farmaceutike Ursapharm – e drejtuar fillimisht nga Frank Holzer dhe më pas, nga viti 2011, nga djali i tij Dominik – u bë sponsori i tij kryesor.

Dy vjet më vonë, Elversberg u ngjit në Ligën e Tretë – niveli i tretë dhe i pari plotësisht profesionist. Ekipi ra menjëherë nga kategoria, por kompania Ursapharm bleu të drejtat e emërtimit të stadiumit – duke e quajtur atë “Ursapharm-Arena an der Kaiserlinde” për nder të një peme bliri shekullore që ishte rrëzuar në vitin 2015 – dhe zgjeroi kapacitetin e tij në 10.000 vende.

Një vizion i vërtetë futbollistik ende mungonte, të paktën deri në ardhjen e trajnerit Horst Steffen në vitin 2018. Stili i tij dinamik dhe sulmues i lojës i entuziazmoi tifozët dhe çoi te fitimi i titullit në Regionalliga Südwest në sezonin 2021–22.

Elversberg u rikthye në Ligën e Tretë dhe, këtë herë, ishte gati të ngjitej në një nivel më të lartë. Skuadra e Steffenit e vërtetoi këtë që në fillim të sezonit 2022–23, duke arritur surprizën më të madhe në historinë e saj: një fitore 4–3 ndaj Leverkusenit në raundin e parë të DFB-Pokal.

Elversberg në sezonin 2024-2025 debutoi në Bundesligën 2, ndërsa në sezonin 2025-2026 u ngjit në elitën e futbollit gjerman.