I dënuari përjetë Ardian Çapja humb njeriun e dashur të familjes, kërkon leje nga Burgjet për të marrë pjesë në varri

I dënuar me burgim të përjetshëm, Ardian Çapja ka humbur një nga njerëzit e dashur të familjes.

I akuzuari si kreu i një prej grupeve kriminale në Elbasan, mësohet se ka kërkuar leje për të dalë nga burgu dhe për të marrë pjesë në ceremoninë e varrimit të nënës së tij.

Emri i tij është i njohur për autoritetet shqiptare, ndërsa një prej atentateve më të bujshme ndaj tij ndodhi në vitin 2020, kur u qëllua me snajper pranë banesës së tij në Elbasan.

Emri i tij është lakuar që nga viti 2006 me sagën e përgjakshme të përplasjeve mes dy fiseve në Elbasan dhe që dyshohet se ka sjellë të paktën 12 viktima.

Atentati ndodhi në mëngjesin e 8 qershorit, teksa Çapja ndodhej në banesën e tij. Ai u qëllua me një plumb në shpatull nga një distancë e largët. Sipas burimeve të kohës, sulmi ishte kryer me snajper.

Plumbi e plagosi rëndë Çapjan dhe i kaloi pranë zemrës. Pas atentatit, ai u transportua fillimisht në spitalin e Elbasanit dhe më pas u dërgua me urgjencë në Spitalin e Traumës në Tiranë, ku iu nënshtrua një operacioni.

Pas disa orësh ndërhyrjeje, Çapja doli jashtë rrezikut për jetën.

Sipas të dhënave të bëra publike në atë kohë, atentatori e kishte mbajtur Çapjan nën vëzhgim dhe kishte zgjedhur një pozicion të përshtatshëm për të qëlluar.

Burimet e kohës dyshonin se snajperisti dhe persona të tjerë të përfshirë në atentat ishin pozicionuar në një servis pranë banesës së Çapjas. Distanca në vijë ajrore mendohej të ishte rreth 150 metra.

Pas të shtënave, autorët u larguan nga zona, ndërsa policia nisi menjëherë hetimet për identifikimin e tyre dhe zbardhjen e motivit të atentatit.