Java e filmit shqiptar në Berlin, nga prodhimet e Kinostudios deri te krijimet më të fundit të kinemasë sonë

Filma të kinemasë shqiptare po shfaqen në “Fly Like an Eagle” në Berlin. Festivali i Filmit Shqiptar “Fly Like an Eagle” u hap me filmin “Vdekja e kalit” me regji nga Saimir Kubaro, për të vijuar dhe me të tjerë prodhime të kinemasë shqiptarë. Më 7 maj në Babylon Berlin bashkë me shfaqjen e filmit “Vdekja e kalit” publiku i pranishëm pati rastin të takojë dhe aktorin e mirënjohur shqiptar Timo Flloko dhe të bashkëbisedojë me të, me moderimin e Odeta Çunajt.

“Vdekja e Kalit” drama e parë filmike pas rënies së diktaturës, me regji nga Saimir Kumbaro dhe skenar nga Nexhati Tafa me muzikë nga Rene Aubry është realizuar në vitin 1992. Timo Flloko, Rajmonda Bulku, Niko Kanxheri janë ndër aktorët në këtë film. Arkivi Qëndror Shtetëror i Filmit shprehet se përgjatë datave 7-13 maj, netët e filmit shqiptar sjellin 20 filma shqiptarë, nga klasikët e restauruar të Kinostudios “Shqipëria e Re”, deri te krijimet më të fundit të kinemasë moderne shqiptare, dokumentarë dhe filma të shkurtër.

Mbrëmja e hapjes u përshëndet nga ambasadorja e Shqipërisë në Gjermani, Adia Sakiqi, drejtori i AQSHF-së Eljan Tanini, si dhe kuratori i programit Elson Zguri, të cilët vlerësuan rëndësinë e këtij festivali si një urë kulturore mes Shqipërisë dhe publikut gjerman e ndërkombëtar.

Në kuadër të festivalit u prezantua edhe ekspozita e artistit shqiptar Klevis Ibrahimi, me 12 piktura të frymëzuara nga ikonat e filmit shqiptar. Festivali organizohet me mbështetjen e Ambasadës së Shqipërisë në Berlin, Ministrisë së Turizmit, Kulturës dhe Sportit, CulturAlb, Qendrës Kombëtare të Kinematografisë, Arkivit Qendror Shtetëror të Filmit, Babylon Berlin dhe kuratorit të programit Elson Zguri.