Kandidati për President/ Obama mbështet zyrtarisht Biden

Ish-presidenti i SHBA-së, Barack Obama, mbështeti zyrtarisht ish-zëvendëspresidentin, Joe Biden, për të fituar nominimin e Partisë Demokratike si kandidat për president në zgjedhjet e vitit 2020.

“Joe ka karakterin dhe përvojën për të na udhëhequr në një prej kohërave tona më të errëta “, tha Obama në një video 12-minutëshe të postuar në mediat sociale. Unë besoj se Joe i ka të gjitha cilësitë që na duhen për një president tani”, shtoi ai, duke e cilësuar zgjedhjen e tij që të garonin bashku me Biden në vitin 2008 si “një nga vendimet më të mira që ka marrë ndonjëherë”.

Mbështetja nga Obama vjen një ditë pasi rivali i Bidenit në garën brenda demokratëve, senatori Bernie Sanders, njoftoi se do ta përkrahte ish-nënpresidentin në përpjekjen e tij për të mposhtur republikanin Donald Trump, në zgjedhjet e nëntorit. Mbështetja e Sanders, e cila erdhi një javë pasi ai doli nga gara presidenciale, u konsiderua si një përpjekje për të konsoliduar Partinë Demokratike e cila është e ndarë në ideologji. Ekzistojnë shqetësime se disa figura nga krahu i saj përparimtar nuk do ta mbështesin Bidenin.

Ndërkohë, një ndihmëse e këtij të fundit e ka akuzuar kandidatin presidencial të partisë demokrate për sulm seksual ndaj saj gjatë fillimit të viteve 1990 kur ai ishte senator. Fushata e tij i mohon akuzat.