KINEMA – Aktori dhe aktivisti Danny Glover zbulon se vuan nga Alzheimeri

– Aktori dhe aktivisti i njohur Danny Glover, i famshëm për rolin e policit, Roger Murtaugh në serinë e filmave “Lethal Weapon”, ka njoftuar se vuan nga sëmundja e Alzheimerit.

Katër herë i nominuar për çmimin “Emmy”, aktori, i cili më 22 korrik mbush 80 vjeç, tha për emisionin “Today” dhe revistën “People” se ishte diagnostikuar me këtë sëmundje progresive, që dëmton kujtesën, tre vjet më parë.

“Ende nuk e kam pranuar plotësisht në mendjen time. Ka momente, që të kujtojnë se ende mund të mbash mend gjëra, por ka edhe momente që nuk do t’i harroj kurrë”, u shpreh ai për “People”.

Alzheimeri është forma më e zakonshme e demencës dhe ka prekur më shumë se 6 milionë njerëz në Shtetet e Bashkuara të Amerikës, si dhe miliona të tjerë në mbarë botën.

Gjatë karrierës së tij, Glover është nominuar katër herë për çmimin “Emmy”, ndërsa në vitin 2022 u nderua me një çmim “Oscar” për kontributin e tij në kinematografi.

Ai ka marrë gjithashtu vlerësime nga NAACP (Shoqata Kombëtare për Progresin e Njerëzve me Ngjyrë) dhe “Black Entertainment Television”, si edhe nominime nga “Screen Actors Guild” (Shoqata e Aktorëve të Ekranit).

Përveç karrierës artistike, Danny Glover ka qenë ambasador i vullnetit të mirë i Programit të Kombeve të Bashkuara për Zhvillim (UNDP) nga viti 1998 deri në vitin 2004, duke mbështetur nisma, që lidhen me luftën kundër varfërisë, sëmundjeve dhe zhvillimin ekonomik në Afrikë, Amerikën Latine dhe Karaibe. /