KLP hap garën për Prokurorin e Përgjithshëm, kandidatët 30 ditë afat për të bërë aplikimet

Këshilli i Lartë i Prokurorisë, KLP këtë të enjte ka zhvilluar seancë plenare ku vendosi shpalljen e fillimit të procedurës administrative për përzgjedhjen e kandidatëve për Prokuror të Përgjithshëm, përmes thirrjes publike për aplikim.

Prokurori i Përgjithshëm në Republikën e Shqipërisë, zgjidhet nga Kuvendi me një shumicë të cilësuar prej tre të pestash të të gjithë deputetëve, ndërmjet kandidatëve të propozuar nga Këshilli i Lartë i Prokurorisë. Mandati i tij është 7-vjeçar dhe nuk mund të rinovohet. Prokurori aktual i Përgjithshëm, Olsian Çela i përfundon mandati më 5 dhjetor 2026.

Afati për paraqitjen e aplikimeve është 30 ditë, duke filluar nga data e shpalljes së thirrjes publike.

Në përputhje me nenin 22 të ligjit nr. 97/2016 “Për organizimin dhe funksionimin e Prokurorisë në Republikën e Shqipërisë” dhe rregulloren e miratuar nga Këshilli, kandidatët duhet të plotësojnë këto kushte:

Të kenë 15 vjet përvojë pune si jurist i spikatur;

Të jenë diplomuar në Shkollën e Magjistraturës ose të kenë gradë shkencore në drejtësi;

Të mos kenë mbushur moshën e daljes në pension sipas nenit 64, pika 3, të ligjit nr. 96/2016;

Të mos kenë mbajtur, gjatë 10 viteve të fundit, funksione politike në administratën publike;

Të mos kenë mbajtur, gjatë 10 viteve të fundit, pozicione drejtuese në partitë politike;

Të mos kenë qenë anëtarë, bashkëpunëtorë ose të favorizuar të ish-Sigurimit të Shtetit para datës 2 korrik 1991;

Të mos jenë dënuar me vendim gjyqësor të formës së prerë për kryerjen e një vepre penale;

Të mos kenë qenë bashkëpunëtorë, informatorë ose agjentë të shërbimeve të inteligjencës;

Të mos kenë masë disiplinore në fuqi.

Pas përfundimit të afatit të aplikimit, Këshilli do të vijojë me verifikimin e dokumentacionit, vlerësimin e kandidatëve dhe zhvillimin e procedurave të mëtejshme të përzgjedhjes, në përputhje me Kushtetutën, ligjin dhe rregulloren përkatëse.