Komente negative edhe për Kalanë e Rozafës, Rama: Çfarë keni o patriotë apo ta shkatërrojmë sa të mundemi turizmin? Uroj që Prokuroria të veprojë

Kryeministri Edi Rama ka publikuar një video në rrjetet sociale, ku denoncon komentet negative të lëna në platformat online, të cilat tashmë kanë në shënjestër jo vetëm bizneset, por edhe monumentet e trashëgimisë kulturore, si Kalaja e Rozafës.

Kreu i qeverisë i ka bërë thirrje Prokurorisë të ndërhyjë ndaj personave që, sipas tij, dëmtojnë imazhin e vendit përmes komenteve denigruese në internet.

“Po me Kalanë e Rozafës çfarë keni o patriota apo ta shkatërrojmë sa të mundemi turizmin, se duhet t’i përzemë të huajt dhe të kthehemi tek koha kur hanim njëri-tjetrin ëëë?! Uroj që prokuroria të veprojë një orë e më parë me këta dhunues të pronës publike e private dhe shantazhues të qytetarëve të këtij vendi”, shkruan Rama.

Prej disa javësh, qeveria ka denoncuar një fushatë të organizuar që, sipas saj, synon të dëmtojë imazhin e bizneseve dhe turizmit në Shqipëri. Kryeministri Edi Rama ka akuzuar grupe të caktuara se publikojnë komente denigruese dhe vlerësime të rreme për biznese në fushën e turizmit, ndërsa po ashtu edhe Policia e Shtetit ka nisur një hetim.