Lajm i mirë për Shqipërinë, BE pritet të mbyllë 3 kapitujt e parë të negociatave javën e ardhshme

Shqipëria pritet të shënojë një tjetër hap të rëndësishëm në procesin e integrimit europian, duke mbyllur javën e ardhshme tre kapitujt e parë të negociatave për anëtarësim në Bashkimin Europian.

Sipas agjencisë rajonale të lajmeve DTT, me propozim të presidencës irlandeze të Këshillit të BE-së, ambasadorët e 27 shteteve anëtare kanë nisur diskutimet për mbylljen e kapitullit 25 (Shkenca dhe Kërkimi Shkencor), kapitullit 26 (Arsimi dhe Kultura) dhe kapitullit 30 (Marrëdhëniet me Jashtë).

Ky zhvillim vjen pas vlerësimeve pozitive të bëra së fundmi nga Presidentja e Komisionit Europian, Ursula von der Leyen, dhe Përfaqësuesja e Lartë e Bashkimit Europian për Politikën e Jashtme dhe Sigurinë, Kaja Kallas, të cilat kanë përgëzuar Shqipërinë për progresin e arritur në reformat që lidhen me procesin e integrimit.

Ndërkohë, më 14 korrik, në Bruksel, gjatë mbledhjes së ministrave të Çështjeve Evropiane, Mali i Zi pritet të mbyllë edhe dy kapituj të tjerë të negociatave, përkatësisht kapitullin 8 (Konkurrenca) dhe kapitullin 29 (Bashkimi Doganor).

Po në të njëjtën datë, Moldavia dhe Ukraina pritet të hedhin një tjetër hap në rrugën drejt anëtarësimit në BE, duke hapur grupet e para të kapitujve negociues.

Pas marrjes së një vlerësimi pozitiv për raportin IBAR, Shqipëria ka si objektiv mbylljen e të gjithë kapitujve të negociatave brenda dy viteve të ardhshme, me synimin për t’u bërë anëtare me të drejta të plota e Bashkimit Europian në vitin 2030.