Lëndime në qafë dhe kokë, mjekët tregojnë si paraqitet gjendja e efektivit të plagosur

Doktoresha e spitalit të Traumës dhe kreu i Urgjencës  kanë dhënë detaje mbi gjendjen shëndetësore të efektivit të plagosur gjatë operacionit në Maliq, i cili u transportua me helikopter pas ngjarjes së rëndë ku humbi jetën një koleg i tij.

Sipas doktoreshës, pacienti aktualisht ndodhet i intubuar, por një përgjigje më të saktë për gjendjen e policit do të japë në vijim.

“Pacienti është pritur në spitalin e Korçës, është stabilizuar aty, është aktualisht i intubuar siç e patë erdhi me helikopter. Është bërë punë shumë e mirë nga kolegët e Korçës, ndërkohë që tani u fut menjëherë në brenda ambienteve të bllokut operator dhe po vlerësohet nga ekipi multidisiplinor dhe kirurg përgjithshëm. Do dimë t’ju themi më shumë për ecurinë në vijim. Për momentin mund të themi vetëm që po bëhet maksimumi për të marrë rezultatin maksimal për shëndetin e pacientit. Ka lëndime në pjesën e qafës dhe të kokës. Unë nuk besoj që duhet të hyj më me detaje. Gjithmonë një traumë e këtyre përmasave është jetë kërcënuese. Se si do jetë ecuria do duhet të na thotë ekipi mjekësor që po bën vlerësimin. Është herët akoma për të thënë”, tha doktoresha.

Ndërsa shefi i urgjencës, Skënder Brataj tha se në këto momente gjendja e policit është stabël, ndërsa autori është nisur me ambulancë drejt Spitalit të Traumës.

“Gjatë transportit efektivi ka qenë stabel nuk flitet për rrezik jete por është në dinamikë velrësimi. Autori është vlerësuar nga ekipi i Korçës, është nisur me ambulancë edhe është rrugës për në Tiranë”.