Lobimi për hapjen e negociatave, Pitella: Shqipëria, në drejtimin e duhur

I ftuar nga “Miqtë e Europës” në Bruksel për takimin e përvitshëm mbi Ballkanin, ministri i Jashtëm Ditmir Bushati u prit fillimisht nga homologu i tij belg, Didier Reynders, me të cilin bisedoi mbi reformat e ndërmarra nga Shqipëria në lidhje me nisjen e negociatave të anëtarësimit me Bashkimin Europian dhe marrëdhëniet dypalëshe.
Ditmir Bushati, ministër i Jashtëm: Janë shënuar disa ngjarje të rëndësishme, si aplikimi i vulës apostile, hyrja në fuqi e marrëveshjes për sigurimet shoqërore dhe ajo e transportit, që kanë ndikime të drejtpërdrejta në jetën e përditshme dhe procedurat konsullore, me të cilën përballen qytetarët shqiptarë që jetojnë në Belgjikë. Sikundër diskutuam edhe për mbështetjen, që i ka dhënë e do të vazhdojë t’i japë Belgjika aspiratës sonë për çeljen e negociatave, e ndërthurur kjo edhe me rëndësinë që ka reforma e drejtësisë, në mënyrë që Shqipëria të sigurojë këtë vit, fillimisht rekomandimin e Komisionit Europian dhe më pas mbështetjen e vendeve anëtare, për të nisur procesin e negociatave të anëtarësimit.
Në Parlamentin Europian, shefi i diplomacisë shqiptare u prit nga raportuesi Knut Fleckenstein dhe kreu i grupimit të majtë, Gianni Pitella, teksa ky i fundit u shpreh pozitiv pas takimit, për çeljen e negociatave të anëtarësimit me Shqipërinë brenda këtij viti.
Gianni Pitella, President i grupit “S&D” në PE: Shqipëria po ecën në drejtimin e duhur. Ende mbeten disa gjëra për t’u bërë, siç është reforma për drejtësinë, dhe nëse këto mbyllen shpejt, jam i bindur se Shqipëria mund të nisë vërtet procesin  e negociatave. Mendoj se qeveria shqiptare, e drejtuar nga miku im, Edi Rama, të cilin e çmoj shumë, dhe opozita duhet të jenë të bashkuara për objektivin e hapjes së negociatave, pasi do të mbeten në histori.
Gjatë vizitës dyditore në Bruksel, agjenda e ministrit të Jashtëm, Ditmir Bushati, parashikon edhe pjesëmarrjen në Komitetin e Jashtëm të Parlamentit Europian, gjatë diskutimit të parë mbi raportin e përpiluar nga raportuesi Fleckenstein mbi Shqipërinë, përveç takimeve me Përfaqësuesen e Lartë të BE-së, Federica Mogherini, dhe Komisionerin Hahn, të cilët parashikohet të vizitojnë Tiranën gjatë muajit të ardhshëm.