Magyar: Do të hiqet kufizimi i epokës së Orbanit që ndalonte adoptimin e fëmijëve nga homoseksualët

Qeveria e Hungarisë do të ndryshojë legjislacionin e miratuar në vitin 2020 nga ish-qeveria e Viktor Orbanit, i cili në fakt kishte ndaluar adoptimin nga homoseksualët.

Birësimi në Hungari, një shtet anëtar i Bashkimit Evropian, nga çiftet gej dhe lezbike ishte i mundur deri në fund të vitit 2020 nëse njëri partner aplikonte si person i vetëm.

Sipas ligjit të miratuar nga partia e krahut të djathtë Fidesz e Orbanit në vitin 2020, kërkesat e beqarëve për birësim duhej të miratoheshin nga ministri i çështjeve familjare, gjë që ka çuar në një ndalim efektiv.

“Mund të themi pa mëdyshje se do ta ndryshojmë këtë sistem: nuk duhet të jetë ministri, një politikan… ai që merr vendimin në raste të tilla, por profesionistë të aftë për të përcaktuar kushtet në të cilat një fëmijë i vogël mund të arrijë… një jetë që i lejon të bëhet një anëtar i lumtur dhe harmonik i shoqërisë”, tha kryeministri Peter Magyar në një konferencë për shtyp.

Orban, i cili e paraqiti veten si mbrojtës të asaj që ai e quajti vlera të krishtera nga liberalizmi perëndimor, miratoi ligje që i dhanë fund ndryshimit të gjinisë në dokumentet personale, duke ndaluar në mënyrë efektive adoptimin nga çiftet e të njëjtit seks dhe duke ndaluar materialet në shkolla që shihen si promovuese të homoseksualitetit ose tranzicionit gjinor.