MANILA – Rubio: Ndërprerjet teknike në sistemet amerikane nuk lidhen me sulmet kibernetike
MANILA, 18 nëntor /ATSH-DPA/ – Ndërprerjet e fundit teknike në Shtetet e Bashkuara të Amerikës nuk janë shkaktuar nga aktorë të huaj, deklaroi sot në Filipine sekretari amerikan i Shtetit, Marco Rubio.
Sipas tij, të gjitha të dhënat e deritanishme, tregojnë se bëhet fjalë për incidente të veçanta dhe se asnjëri prej tyre nuk është shkaktuar nga një aktor keqdashës apo kriminel kibernetik. “Ne nuk jemi nën një sulm sistematik”, deklaroi Rubio.
Shtetet e Bashkuara të Amerikës, janë përballur së fundmi me një sërë ndërprerjesh teknike, përfshirë një problem global që preku shërbimet e kompanisë “Microsoft”.
Të premten, një defekt teknik në Administratën Federale të Aviacionit (FAA) detyroi autoritetet të ndalonin përkohësisht të gjitha fluturimet në shkallë kombëtare, një masë jashtëzakonisht e rrallë.
Kompania ajrore “United Airlines” raportoi probleme teknike të hënën, ndërsa disa banka amerikane patën ndërprerje të shërbimeve bankare online.
Edhe Agjencia e Sigurisë Kombëtare (NSA) raportoi dje probleme teknike.
Rubio tha se qytetarët amerikanë, nuk kanë arsye të shqetësohen për një kërcënim të mundshëm. Ai shtoi se qeveria do ta informonte publikun nëse do të zbuloheshin prova për një kërcënim të tillë. /



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.