Marrëdhëniet Beograd–Podgoricë në pikën më të ulët që nga rënia e Gjukanoviçit

Marrëdhëniet mes Beogradit dhe Podgoricës janë në pikën më të ulët që nga rënia e regjimit të Millo Gjukanoviçit, shkruan Blic. Tensionet janë ndezur pas fjalimit të presidentit malazez Jakov Millatoviç në Asamblenë e Përgjithshme të OKB-së në Nju Jork, ku ai e goditi Serbinë për varrosjen e Ratko Mlladiçit.

“Pajtimi në Ballkanin Perëndimor nuk mund të ndërtohet mbi mohimin, qasjen selektive ndaj drejtësisë apo lavdërimin e kriminelëve të dënuar të luftës”, tha Millatoviç në Nju Jork, sipas raportimit të Blic-it.

Tensionet u thelluan më tej kur Parlamenti i Malit të Zi miratoi ndryshimet kushtetuese që i mohojnë edhe një herë serbishtes statusin e gjuhës zyrtare — me votat e Nova srpska demokratija (NSD) të kryetarit të parlamentit Andrija Mandiq, shkruan Blic. Po ashtu, teksti i ri shkollor malazez “Poznavanje društva” për klasën e pestë nuk i përmend serbët as si popull konstituiv e as si pakicë.

Sipas Blic-it, Mali i Zi dërgoi të ngarkuarin e tij me punë nga Zagrebi në Knin për përkujtimin e operacionit ushtarak “Oluja” të vitit 1995, në të cilin u dëbuan rreth 250 mijë serbë dhe u vranë ose rezultojnë ende të zhdukur rreth 2 mijë prej tyre. Kryeministri Millojko Spajiç akuzoi Vuçiçin se “mori rolin e PR-it të Rusisë” dhe se Beogradi zbaton standarde të dyfishta në marrëdhëniet me Moskën dhe BE-në.

“Serbët në Malin e Zi aktualisht nuk janë as në qiell as në tokë”, tha Milan Kneževiq nga Demokratska narodna partija në një intervistë për Blic, duke përshkruar pozitën e komunitetit serb në shtetin fqinj.