Lopez-Isturiz pret mbështetjen e dy të tretave të deputetëve për ndryshimet kushtetuese për provimin e integritetit

Antonio Lopez-Isturiz, zëvendëspresident i Komisionit për Çështje Kushtetuese dhe anëtar i Komisionit për Punë të Jashtme të Parlamentit Evropian, deklaroi se pret që deputetët e Kuvendit të Malit të Zi — si nga pushteti, ashtu edhe nga opozita — të mbështesin ndryshimet kushtetuese me të cilat do të futeshin provimet e integritetit për funksionarët e ardhshëm shtetërorë, siç njofton RTCG.

Në një postim në platformën X, Lopez-Isturiz u shpreh se, pas punës së gjerë e të suksesshme të Qeverisë dhe Kuvendit të Malit të Zi, deputetët kanë tani mundësinë të zbatojnë rekomandimet e Komisionit Evropian dhe të kontribuojnë në mbylljen e Kapitullit 23 të negociatave.

Sipas tij, lufta kundër korrupsionit dhe anëtarësimi i plotë në Bashkimin Evropian janë objektiva që i ndan shumica e madhe e qytetarëve të Malit të Zi.

“Besoj se të paktën dy të tretat e deputetëve do të tregojnë përgjegjësinë e nevojshme për të bërë këtë hap kyç drejt përfundimit të negociatave për anëtarësim në BE”, theksoi Lopez-Isturiz.

Kujtojmë se votimi i parë në Kuvend për ndryshimet kushtetuese për provimin e integritetit të ministrave dështoi më 16 shtator, kur u siguruan vetëm 46 vota pro, ndërsa nevojiteshin 54; çështja u diskutua më pas edhe në një takim të pushtetit dhe opozitës në Delegacionin e BE-së në Podgoricë.