Mazniku reagon për protestën: Ata që dogjën Piramidën, nuk përfaqësojnë studentët!

Bashkëkryetari i Komisionit të Posaçëm për Reformën Territoriale, Arbjan Mazniku, ka reaguar për protestën e sotme studentore.

Në një moment përshkallëzimi, protestuesit dëmtuan dhe dogjën Piramidën, për të cilën Mazniku thotë se u ndërtua si” një shtëpi e të rinjve, e dijes dhe teknologjisë. Sipas tij ata që dogjën Piramidën, nuk përfaqësojnë studentët.

Postimi i plotë i Maznikut:

“Piramida u ndërtua si një shtëpi e të rinjve, e dijes dhe e teknologjisë.

Sot, në Piramidë, 6,540 të rinj mësojnë në TUMO Tirana dhe École 42 Tirana, ndërsa 50 startup-e zhvillojnë idetë dhe bizneset e tyre në Plug and Play.

Kjo është Piramida që u dogj dhe u dëmtua gjatë protestës.

Protesta është një e drejtë demokratike. Por djegia dhe shkatërrimi i një hapësire publike të ndërtuar për të rinjtë nuk është protestë studentore.

Është shkatërrim i pikërisht atyre mundësive që pretendohet se kërkohen për të rinjtë.

Ata që e dogjën dhe e shkatërruan Piramidën nuk përfaqësojnë studentët”.