Mbi 309,000 persona morën pasaporta gjermane në vitin 2025, 17,000 më shumë se në vitin 2024

Më shumë se 309,000 njerëz morën pasaporta gjermane në vitin 2025, kështu që ky vend është në rrugën e duhur për të arritur një rekord të ri në dhënien e shtetësisë, raportuan sot mediat gjermane.

Siç u tha, një nga arsyet për këtë është reforma e ligjit për shtetësinë.

Sipas një studimi të gazetës “Welt am Sonntag”, numri i pasaportave të lëshuara vitin e kaluar tejkaloi shifrën prej 292,000 të lëshuara në vitin 2024.

Sipas gazetës, të dhënat vijnë nga 14 shtete gjermane, dhe mungojnë vetëm Mecklenburg-Pomerania Perëndimore dhe Saksonia-Anhalt.

Po kështu, nuk ka një numër të përgjithshëm të pasaportave të lëshuara për Saksoninë e Poshtme, Saarlandin dhe Schleswig-Holsteinin, por pothuajse të gjitha qytetet dhe rrethet në këto shtete kanë dhënë të dhënat e tyre të natyralizimit me kërkesë, ndërsa disa nga shifrat janë ende paraprake.

Autoritetet në disa rrethe vlerësojnë se një numër në rritje ukrainasësh po kërkojnë shtetësi gjermane.

“Që nga fillimi i valës së parë të madhe të refugjatëve me fillimin e konfliktit në Ukrainë më 24 shkurt 2022, refugjatët e parë ukrainas që mbërritën do të përmbushin kërkesën e qëndrimit pesëvjeçar në pranverën e vitit 2027 në mënyrë që të bëhen të ligjshëm për shtetësi”, tha një zëdhënës i distriktit Aurich.

Statusi i mbrojtjes kolektive që u jepet aktualisht refugjatëve skadon në mars të vitit 2027.

“Për të fituar siguri ligjore, shumë refugjatë ndoshta do të përfitojnë nga periudha e shkurtuar pesëvjeçare e natyralizimit, e cila është bërë edhe më tërheqëse për shkak të lejes së re të shtetësisë së dyfishtë”, tha zëdhënësi.

Komuna dhe rrethe të tjera presin gjithashtu një rritje të numrit të kërkesave, por theksojnë se ukrainasit aktualisht nuk kanë të drejtë ligjore për natyralizim në përputhje me statusin e tyre mbrojtës.

Reforma e ligjit për shtetësinë hyri në fuqi në mesin e vitit 2024, kujton gazeta “Spiegel”. Që atëherë, njerëzve u është lejuar të ruajnë shtetësinë e tyre të mëparshme ndërsa fitojnë shtetësinë gjermane.

Për më tepër, kërkesa e përgjithshme për vitet e qëndrimit në Gjermani është ulur nga tetë në pesë, dhe qeveria e re federale i mbështet këto ndryshime.

Numri i pasaportave të lëshuara në vitin 2024 prej gati 292,000 ishte një rekord që nga fillimi i statistikave në vitin 2000 dhe përfaqësonte një rritje prej 46 për qind krahasuar me vitin e kaluar.

Nga numri i përgjithshëm i personave që morën shtetësi gjermane, 28 përq ind erdhën nga Siria, e ndjekur nga qytetarët e Turqisë.

Sipas të dhënave të publikuara në “Welt am Sonntag”, rritja e numrit të pasaportave të lëshuara në vitin 2025 do të arrinte në gjashtë për qind krahasuar me një vit më parë.