Mbrëmje artistike në Muzeun Etnografik të Elbasanit

Të rinjtë e Elbasanit zhvilluan një mbrëmje muzikore në Muzeun Etnografik te qytetit.

Lulishtja e këtij muzeu u shndërrua në një skenë të veçantë artistike, ku talentet e reja të qytetit dhuruan një mbrëmje plot emocion, pasion dhe muzikë cilësore. Aktiviteti, i organizuar nga Drejtoria e Artit dhe Kulturës në kuadër të Ditës Botërore të Muzikës, mblodhi dhjetëra qytetarë, të cilët ndoqën interpretimet e artistëve të rinj në një nga ambientet më karakteristike të trashëgimisë kulturore të qytetit.

Përmes performancave të tyre, të rinjtë dëshmuan talentin, përkushtimin dhe dashurinë për muzikën, duke konfirmuar edhe një herë se Elbasani vijon të kultivojë breza artistësh të talentuar dhe të mbështesë zhvillimin e jetës kulturore.

Në përfundim të aktivitetit u shprehën falënderime për të gjithë artistët e rinj pjesëmarrës, si edhe për profesorët dhe mësuesit, të cilët me punën dhe përkushtimin e tyre kontribuojnë çdo ditë në formimin dhe frymëzimin e brezit të ri të artistëve. /j.p/