Mijëra qytetarë presin studentët biciklistë në Nish e Sombor; tension në Kalanë e Nishit

Mijëra qytetarë të Nishit i pritën sonte studentët biciklistë, të cilët mbërritën në qytet rreth orës 21:00. Në të njëjtën kohë, një pritje e madhe u organizua edhe në Sombor, ku mbërriti grupi tjetër i studentëve që po bën turin në veri të vendit.

Në Nish, qytetarët e mbledhur thërrisnin “Pobeda! Pobeda!”, ndërsa pritja u shoqërua me muzikë. Mes biciklistëve që mbërritën në Nish ishte edhe një studente e Universitetit të Nishit, e cila mbajti fjalim së bashku me Slavoljub Uzunovićin, kandidatin e Listës Studentore nga Universiteti i Nishit.

Pas përfundimit të tubimit mbështetës para Kalasë së Nishit, aktivistët e SNS-së, partisë së presidentit Aleksandar Vuçiç, u ngjitën në kala me pankartën “Srbija pobeđuje”, duke sharë e fyer qytetarët që ktheheshin nga tubimi, raporton N1.

Në urën e kalasë, qytetarët u pritën nga një kordon aktivistësh të SNS-së dhe tenda që ata kishin ngritur para tubimit studentor; aktivistët e mbyllën “festën” me pishtarë (bakljada) pikërisht mbi vendin ku ishte zhvilluar tubimi mbështetës për studentët. Mes dy tubimeve qëndronte policia.

Në Sombor, qytetarët krijuan kordon për t’i lejuar kolonës së biciklistëve të arrinte te skena e improvizuar; ishte shtruar tapet i kuq, valëviteshin flamuj dhe pankarta mbështetëse, ndërsa studentët u pritën me thirrjet “pumpaj, pumpaj”. Simpatizantët e partisë në pushtet kishin ngritur tendën e tyre pranë godinës së Zhupanisë (bashkisë së qytetit).

Para mbërritjes së studentëve, aktivistët e SNS-së kishin ngritur tenda edhe pranë vendit të tubimit në Nish — ashtu siç kishin bërë edhe në qytetet e tjera ku kaluan studentët. Nesër në mëngjes studentët nisen nga Nishi drejt Prokupljes e Leskovcit, ndërsa destinacioni përfundimtar është Vranja, në skajin jugor të Serbisë.

Burimi: Nova.rs