“Miku i librit” dhe “Biblioteka e artit” sjellin lexime, biseda dhe takime me autorë dhe studiues arti në shkolla

Përgjatë muajit maj, “Miku i librit” dhe “Biblioteka e artit” përfshinë seanca leximesh dhe biseda me shkrimtarë dhe përkthyes, si dhe takime me studiues arti dhe autorë librash arti.

“Miku i librit” dhe “Biblioteka e artit”, dy fushata që Qendra Kombëtare e Librit dhe Leximit organizoi në disa shkolla të kryeqytetit me motot: “Së bashku krijojmë një shkollë që lexon” dhe “Artistët e së nesërmes “takojnë” artistët e së djeshmes”,patën një ditë më parë seancat përmbyllëse. QKLL shprehet se shkrimtarët bashkëbiseduan me lexuesit, studiuesit e artit me artistët e ardhshëm.

“QKLL-ja i konsideron takimet e majit si një hap zanafillor që do të ndiqet nga të tjerë, me qëllimin për t’i shndërruar në traditë”, thuhet nga QKLL.

Më tej Qendra Kombëtare e Librit dhe Leximit shprehet gjithashtu se vlerëson mbështetjen e Ministrisë së Arsimit, Drejtorisë Arsimore Tiranë,shkollave: Gjimnazi me orientim gjuhësor “Asim Vokshi”;Gjimnazi “Ismail Qemali”; Shkolla 9-vjeçare “Skënder Çaçi”; Shkolla jopublike “Faik Konica”; Liceu artistik “Jordan Misja”.

Gjithashtu Qendra Kombëtare e Librit dhe Leximit (QKLL)vlerëson gatishmërinë e shkrimtareve e të studiuesve për të qenë në takime me nxënësit dhe gatishmërinë e botuesve për të ofruar disa kopje librash dhuratë për bibliotekat e shkollave, ku u zhvilluan takimet. Në vijim nga QKLL do të ketë të tjera aktivitete me në fokus librin dhe leximin.