Mojsiloviç: Situata e sigurisë në Kosovë mbetet e ndjeshme — serbët nuk ndihen të sigurt

Shefi i Shtabit të Përgjithshëm të Ushtrisë së Serbisë, Milan Mojsiloviç, u takua sot në Beograd me komandantin në largim të KFOR-it, gjeneralmajorin Ozkan Ulutaş, siç njofton gazeta Danas, duke cituar deklaratën e Ministrisë së Mbrojtjes së Serbisë.

Gjatë takimit, Mojsiloviç e përshkroi situatën e sigurisë në Kosovë si “të ndjeshme”, duke theksuar se serbët në Kosovë nuk ndihen të sigurt, sipas raportimit të Danas.

Ai theksoi se KFOR-i, si i vetmi formacion i legjitimuar i armatosur, ka detyrimin të sigurojë një mjedis të qetë dhe të sigurt dhe të mbrojë mbi të gjitha serbët, si dhe trashëgiminë fetare, kulturore dhe historike serbe.

Në takim u diskutua gjithashtu bashkëpunimi mes Ushtrisë së Serbisë dhe KFOR-it për ruajtjen e paqes, me një shqyrtim të rezultateve dhe sfidave të mandatit njëvjeçar të gjeneralit turk në krye të misionit.

Gjeneralmajori Ulutaş do të zëvendësohet në mes të tetorit nga gjeneralmajori italian Roberto Vergori, i cili do të marrë komandën e KFOR-it.