MONTREAL – Kanadaja dhe BE-ja shpallin aleancën e re

– Kanadaja dhe Bashkimi Evropian kanë shpallur krijimin e një aleance të re strategjike, të quajtur “Aleanca për të Ardhmen”, me synimin për të thelluar bashkëpunimin në tregti, siguri, energji, teknologji dhe mbrojtje, sipas “Time”.

Njoftimi u bë sot nga kryeministri kanadez, Mark Carney, presidentja e Komisionit Evropian, Ursula von der Leyen, dhe presidenti i Këshillit Evropian, António Costa, gjatë samitit Kanada-BE, që u zhvillua në Montreal më 29 dhe 30 tetor.

Carney deklaroi se Kanadaja dhe BE-ja synojnë të ndërtojnë partneritetin më të thellë të mundshëm, duke shqyrtuar mundësinë që Kanadaja të bëhet anëtari i parë i asociuar i Bashkimit Evropian.

Kjo do të ishte një formë e re bashkëpunimi, pa e bërë Kanadanë anëtare të plotë të BE-së.

Sipas Carney, në muajt e ardhshëm palët do të përcaktojnë përmbajtjen dhe shtrirjen e këtij statusi, ndërsa synojnë të përmbyllin negociatat deri në samitin e ardhshëm Kanada-BE në qershor 2027.

Në deklaratën e përbashkët, palët u angazhuan të përcaktojnë deri në samitin e vitit 2027 konceptin e një marrëdhënieje edhe më të ngushtë të Kanadasë me BE-në, pa anëtarësim të plotë.

Mbi 20 masa të reja bashkëpunimi

Gjatë samitit, të dyja palët njoftuan më shumë se 20 masa të reja për të forcuar marrëdhëniet ekonomike dhe politike në të dyja anët e Atlantikut.

Ndër nismat kryesore janë:

Tregtia: Përfundimi i negociatave për një marrëveshje të re mbi tregtinë digjitale, e cila do t’u lehtësojë kompanive kanadeze shitjen e produkteve dhe shërbimeve në tregun evropian.

Teknologjia: Kanadaja do të ketë akses në disa nga superkompjuterët më të fuqishëm të Evropës, për të nxitur kërkimin shkencor dhe zhvillimin e inteligjencës artificiale.

Arsimi: Palët do të negociojnë zgjerimin e pjesëmarrjes së Kanadasë në programin Erasmus+, duke krijuar më shumë mundësi për studentët kanadezë që të studiojnë në Evropë.

Mbrojtja: Do të forcohet bashkëpunimi në industrinë ushtarake dhe sigurinë, përfshirë furnizimin me pajisje për vendet evropiane.

Energjia: Kanadaja dhe BE-ja do të shqyrtojnë mundësitë për rritjen e eksporteve të gazit natyror të lëngshëm (LNG) drejt Evropës.

Lëndët e para: Do të krijohet një kuadër bashkëpunimi për investimet dhe rezervat e mineraleve kritike, të nevojshme për industrinë dhe tranzicionin energjetik.

Marrëveshja parashikon gjithashtu bashkëpunim për sistemet e pagesave, shërbimet bankare, sigurimet dhe ndërtimin e infrastrukturës së sigurt të komunikimit mes Evropës dhe Kanadasë.

Afrimi me Evropën në një moment tensionesh me SHBA-në

Afrimi i Kanadasë me Bashkimin Evropian vjen në një periudhë tensionesh tregtare mes Otavës dhe Uashingtonit.

Bisedimet tregtare mes dy vendeve kanë hasur vështirësi, ndërsa Kanadaja po përpiqet të ulë varësinë ekonomike nga Shtetet e Bashkuara dhe të zgjerojë marrëdhëniet me partnerë të tjerë ndërkombëtarë.

Kryeministri Carney ka theksuar se forcimi i lidhjeve me Evropën do t’i japë Kanadasë më shumë mundësi ekonomike dhe siguri në një botë gjithnjë e më të paqëndrueshme.

Nga ana e saj, Ursula von der Leyen ka mbështetur idenë e një marrëdhënieje më të ngushtë mes dy palëve, duke nënvizuar se gjeografia nuk e lejon Kanadanë të bëhet anëtare e plotë e BE-së, por nuk e pengon atë të krijojë një partneritet në nivelin më të lartë të mundshëm.

Nisma e re synon të krijojë një hapësirë më të gjerë bashkëpunimi mes Kanadasë, 27 vendeve anëtare të BE-së dhe shteteve të tjera që ndajnë të njëjtat interesa dhe vlera./