Ndihmëssekretarja Donfried viziton javën e ardhshme Shqipërinë

Ndihmëssekretarja për Byronë e Çështjeve Evropiane dhe Euroaziatike Dr. Karen Donfried do të vizitojë javën e ardhshme Shqipërinë.

Lajmi u bë i ditur nga ambasadorja e Shteteve të Bashkuara të Amerikës, në Tiranë Yuri Kim.

“Ndihmëssekretarja Donfried do të vizitojë Shqipërinë javën e ardhshme për të festuar 100 vjet të marrëdhënieve Shqipëri-SHBA; Faleminderit Shqipërisë për partneritetin në Këshillin e Sigurimit të OKB-së, veçanërisht për angazhimin për Ukrainën; do të nënvizojë mbështetjen e fortë për anëtarësimin Bashkimin Evropian; të inkurajojë zbatimin e reformës në drejtësi dhe luftën kundër korrupsionit”, deklaroi Kim në një postim në Twitter.

Ndihmëssekretarja për Byronë e Çështjeve Evropiane dhe Euroaziatike Dr. Karen Donfried do të udhëtojë në Ballkanin Perëndimor nga 25 deri më 29 prill, me ndalesa në Shqipëri, Bosnje dhe Hercegovinë, Kosovë, Mal të Zi, Maqedoninë e Veriut dhe Serbi.

Në deklaratën e publikuar në faqen e Departamentit Amerikan të Shtetit thuhet se “më 28 prill ajo do të përkujtojë 100 vjetorin e marrëdhënieve diplomatike SHBA-Shqipëri dhe do të falënderojë Shqipërinë për partneritetin tonë në Këshillin e Sigurimit të Kombeve të Bashkuara dhe për angazhimin e saj ndaj sovranitetit dhe integritetit territorial të Ukrainës përballë agresionit rus. Ajo do të nënvizojë gjithashtu mbështetjen tonë të fortë për anëtarësimin e Shqipërisë në BE dhe integrimin ekonomik rajonal, si dhe do të theksojë nevojën për të zbatuar plotësisht reformën në drejtësi dhe për të luftuar korrupsionin”.