NEPAL – Përmbytjet e fuqishme shkatërrojnë banesa dhe ura në qendër të vendit

KATMANDU, 11 tetor /ATSH-DPA/ – Përmbytje të fuqishme goditën sot zonat malore të Nepalit qendror, duke marrë me vete dhjetëra banesa dhe duke dëmtuar rrugë, ura dhe të paktën një hidrocentral.

Sipas autoriteteve, përmbytjet ndodhën përgjatë lumit Budhi Gandaki, pas një rrëshqitjeje toke në rrjedhën e sipërme.

Zëdhënësi i policisë nepaleze, Abi Narayan Kafle, deklaroi se disa banesa dhe infrastruktura u shkatërruan ose u dëmtuan.

Sipas tij, deri në momentin e raportimit nuk kishte njoftime zyrtare për viktima apo persona të zhdukur.

Megjithatë, mediet lokale raportuan se të paktën pesë persona rezultonin të zhdukur.

Pamjet e publikuara në rrjetet sociale treguan ujin e rrëmbyeshëm, të mbushur me baltë dhe mbeturina, duke përfshirë vendbanime dhe shembur ura.

Përmasat e dëmeve materiale mbeten ende për t’u vlerësuar plotësisht.

Autoritetet ndërmorën operacione shpëtimi për evakuimin e banorëve të rrezikuar.

Disa familje të bllokuara u transportuan me helikopterë jashtë zonës së rrezikut, ndërsa qindra persona që jetonin në zonat përgjatë rrjedhës së poshtme të lumit u zhvendosën drejt vendeve të sigurta.

Agjencia kombëtare e menaxhimit të fatkeqësive lëshoi alarm të kuq për banorët që jetojnë në zonat në drejtim të rrjedhës së poshtme të lumit, duke paralajmëruar për rrezikun e përmbytjeve të mëtejshme.

Shkaku i drejtpërdrejtë i fatkeqësisë ishte rrëshqitja e tokës, e cila çliroi papritur sasi të mëdha uji dhe materialesh të ngurta në shtratin e lumit.

Lumi Budhi Gandaki është pjesë e sistemit lumor Trishuli-Narayani, një zonë e ekspozuar ndaj përmbytjeve të rrezikshme.

Në fund të gushtit, përmbytje shkatërruese në Nepal dhe Tibet shkaktuan rreth 1 450 viktima, ndërsa më shumë se 4 500 persona rezultuan të zhdukur, sipas raportimeve të mëparshme.

Fatkeqësia e fundit rikthen shqetësimet për rreziqet natyrore në rajonet malore të Himalajeve.