NEPAL – Të paktën tetë të vdekur dhe 26 të zhdukur pas përmbytjeve

KATMANDU, 26 gusht /ATSH-DPA/- Të paktën tetë persona kanë humbur jetën dhe 26 efektivë policie rezultojnë të zhdukur, pas përmbytjeve të fuqishme dhe të befasishme, që përfshinë Nepalin qendror sot në mëngjes, njoftuan autoritetet.

Përmbytja e lumit Bhotekoshi, në Himalaje, dyshohet se është shkaktuar nga shpërthimi i një liqeni akullnajor në rrjedhën e sipërme të lumit, në rajonin autonom të Tibetit, në Kinë.

Zëdhënësi i policisë, Abi Narayan Kafle tha se numri real i personave të zhdukur, mund të jetë më i lartë, pasi nuk dihet ende fati i disa zyrtarëve të administratës shtetërore dhe punonjësve të hidrocentraleve.

“Deri tani kemi konfirmuar 26 efektivë policie, që rezultojnë të zhdukur nga përmbytja. Gjithashtu, kemi raportime për zyrtarë të administratës dhe punonjës të hidrocentraleve të zhdukur, por ende po mbledhim të dhënat”, tha Kafle.

Kryeministri i Nepalit, Balendra Shah urdhëroi angazhimin e ushtrisë dhe forcave të tjera të sigurisë në operacionet e kërkim-shpëtimit.

Autoritetet kanë paralajmëruar banorët që jetojnë në zonat përgjatë rrjedhës së poshtme të lumit për rrezik të lartë.

Banorët e zonës e kanë përshkruar ngjarjen si një nga përmbytjet më të rënda të dekadave të fundit.

Pamjet e publikuara në rrjetet sociale tregojnë dëme të mëdha në vendbanimet pranë kufirit me Tibetin dhe në zonat përreth. Përmbytjet përfshirë disa hidrocentrale dhe ura.

Ndërkohë, mijëra turistë dhe vizitorë që ndodheshin në itinerarin e njohur të Langtangut kanë mbetur të bllokuar.

Pika kufitare Rasuwagadhi është një nga pikat kryesore të tregtisë së Nepalit me Kinën. /