Neutrogena kërkon falje pas vdekjes së Hayden Panettiere

Neutrogena ka kërkuar falje publikisht për mënyrën se si e trajtoi Hayden Panettiere në vitin 2015, kur ndërpreu bashkëpunimin me aktoren pasi ajo foli hapur për depresionin pas lindjes.

Në një deklaratë të publikuar në Instagram, kompania shprehu keqardhjen për vdekjen e Panettiere dhe pranoi se e kishte bërë aktoren të ndihej e pambështetur gjatë një periudhe të vështirë të jetës së saj.

“E kuptojmë se e bëmë të ndihej e pambështetur gjatë një kohe shumë të vështirë. Kjo nuk është ajo çfarë përfaqëson Neutrogena dhe as ajo që duam të jemi”, thuhet në deklaratë.

Kompania e cilësoi Panettiere si një pjesë të rëndësishme të familjes së saj për më shumë se një dekadë dhe vlerësoi guximin e saj për të folur publikisht mbi vështirësitë që kishte kaluar.

Neutrogena njoftoi gjithashtu se do të bëjë një investim të rëndësishëm në një organizatë shëndetësore, me synimin për t’u ofruar më shumë grave mbështetje dhe trajtim për depresionin pas lindjes.

Në kujtimet e saj, “This Is Me: A Reckoning”, Panettiere kishte pretenduar se Neutrogena nuk e rinovoi kontratën e saj në vitin 2015, pasi ajo kishte folur për depresionin pas lindjes pas lindjes së vajzës së saj, Kaya.

Aktorja kishte treguar se pas lindjes në vitin 2014 kaloi një periudhë jashtëzakonisht të vështirë dhe se vuante nga depresioni pas lindjes dhe varësia.

Panettiere kishte thënë se vendimi i kompanisë për t’i dhënë fund bashkëpunimit ishte “një tjetër goditje” në një periudhë kur jeta e saj po kalonte shumë vështirësi.

Në një intervistë të dhënë në maj, ajo kishte treguar se ishte befasuar që Neutrogena vendosi të mos vazhdonte kontratën pas deklaratave të saj për depresionin pas lindjes.

Panettiere, e cila ishte bërë imazh i Neutrogena-s që në moshën 16-vjeçare, ndërroi jetë më 16 gusht në moshën 36-vjeçare. Shkaku zyrtar i vdekjes ende nuk është bërë publik.

Pas lajmit për vdekjen e saj, fansa të shumtë kritikuan Neutrogena-n në rrjetet sociale dhe kërkuan edhe bojkotimin e kompanisë, duke rikthyer në vëmendje historinë e kontratës së aktores.