Nigeria akuzon gjashtë persona për terrorizëm dhe tradhti për një komplot grushti shteti në 2025

Mes të akuzuarve një gjeneral major në rezervë dhe një inspektor policie, ndërsa ish-guvernatori i Bayelsa ende në arrati

Autoritetet nigeriane kanë ngritur akuza kundër gjashtë zyrtarëve ushtarakë për një komplot të dyshuar për përmbysjen e Presidentit Bola Tinubu. Ndër të akuzuarit janë edhe një gjeneral major në rezervë dhe një inspektor në detyrë i policisë. Dokumentet në Gjykatën Federale të Lartë në Abuja zbulojnë se akuzat përfshijnë terrorizëm dhe tradhti.

Ndërkohë që të gjashtë ndodhen në paraburgim, një i shtatë, ish-Guvernatori i Shtetit Bayelsa, Timipre Sylva, akuzohet për ndihmë në fshehjen e komplotit dhe është ende në kërkim. Fillimisht, qeveria nigeriane mohoi ekzistencën e këtij komploti para se të njoftonte në janar se disa oficerë ushtarakë do të gjykoheshin për planifikim për rrëzimin e qeverisë.

Në aktakuzën me 13 pika, autoritetet pohojnë se të dyshuarit “komplotuan me njëri-tjetrin për të shpallur luftë kundër shtetit me qëllim përmbysjen e presidentit të Republikës Federale”. Të akuzuarit përfshijnë Gjeneral Major në rezervë Mohammed Ibrahim Gana, Kapiten në rezervë Erasmus Ochegobia Victor, Inspektor Ahmed Ibrahim, Zekeri Umoru, Bukar Kashim Goni dhe Abdulkadir Sani. Ata akuzohen gjithashtu për “mbështetje të dijshme” ndaj Kolonelit Mohammed Alhassan Ma’aji dhe të tjerëve për kryerjen e akteve të terrorizmit, ku Ma’aji është cilësuar si “mendja kri*esore” e komplotit.

Nigeria, vendi më i populluar në Afrikë, ka përjetuar pesë grushte shteti në shekullin e 20-të, por nuk ka pasur ndonjë që nga krijimi i demokracisë formale në 1999. Ky zhvillim vjen në sfondin e një rritje të grushteve dhe përpjekjeve për grushte shteti në Afrikën Perëndimore dhe Qendrore vitet e fundit, duke ndjekur një model të trazuar nga zgjedhjet e kontestuara, kriza kushtetuese, sfida sigurie dhe pakënaqësi të rinisë.