Një klikim dhe llogaria bankare bosh! Dy shtetas të huaj pas faqes që dukej si “Posta Shqiptare”

Policia e Shtetit ka finalizuar këtë të hënë, 25 maj, operacionin e koduar “Posta e Rreme 2”, për goditjen e një skeme mashtrimi kompjuterik ndaj qytetarëve shqiptarë.

Sipas hetimeve, shtetas të huaj kishin krijuar faqe të rreme që imitonte faqen zyrtare të Postës Shqiptare.

Përmes dërgimit të mesazheve SMS me linqe mashtruese, ata synonin të përfitonin të dhënat personale dhe bankare të qytetarëve, me qëllim vjedhjen e parave nga llogaritë e tyre bankare.

Në kuadër të operacionit u arrestua një 22 vjeçar francez, ndërsa u shpall në kërkim një 53 vjeçar gjerman.

Gjatë kontrolleve dhe veprimeve hetimore u sekuestruan celularë, karta SIM, karta bankare dhe dokumente të ndryshme që dyshohet se lidhen me aktivitetin kriminal.

---

Policia e Shtetit u bën apel qytetarëve të tregojnë kujdes dhe të mos klikojnë në linqe të dyshimta të dërguara me SMS, email apo rrjete sociale, si dhe të verifikojnë gjithmonë burimin zyrtar përpara se të vendosin të dhëna personale apo bankare.

Gjithashtu, qytetarët këshillohen të mos japin kurrë të dhëna sensitive si numra kartash bankare, kode sigurie apo fjalëkalime në faqe të paverifikuara, dhe të raportojnë çdo rast të dyshuar mashtrimi pranë Policisë së Shtetit.