Operacioni për “Choriatiko” zgjerohet: 50 të arrestuar dhe 520 kompani nën hetim për mashtrim tatimor prej 100 milionë eurosh

Operacioni i policisë greke për zinxhirin e furrëve “Choriatiko” po merr përmasa shumë më të mëdha nga sa u raportua në orët e para. Sipas raportimit të ProtoThema, të ripublikuar mbrëmjen e së dielës nga Metro24, Drejtoria për Luftën kundër Krimit të Organizuar ka kryer tashmë 50 arrestime, ndërsa në hetim janë përfshirë të paktën 520 kompani. Dëmi i dyshuar për shtetin nga mashtrimi tatimor vlerësohet se arrin ose e kalon 100 milionë euro.

Mes të arrestuarve është pronari i zinxhirit, Angelos Giannakopoulos, si dhe një kontabilist, të cilit burimet policore i atribuojnë rol qendror në strukturën e organizatës së dyshuar. Siç njofton ERTnews, arrestimi i biznesmenit u bë pas kthimit të tij nga Dubai: operacioni për kapjen e tij ishte shtyrë disa herë pikërisht për shkak të mungesës së tij nga Greqia. Kontrollet e policisë janë shtrirë përtej Atikës, edhe në ishuj si Mikonos dhe Rodosi, në biznese që dyshohet se kontrolloheshin prej tij përmes personave të vendosur formalisht në krye.

Akuzat nën hetim, siç raporton ProtoThema, përfshijnë mashtrim në dëm të shtetit, evazion fiskal, mospagim të TVSH-së dhe të kontributeve të sigurimeve shoqërore. Në qendër të hetimit janë më shumë se 200 dyqanet e zinxhirit — pjesë të zotëruara drejtpërdrejt dhe pjesë me franchising — si dhe rrjeti i kompanive që, sipas autoriteteve, përdorte “njerëz kashtë” për të fshehur pronësinë reale dhe detyrimet fiskale.

Sipas raportimit të Simera24, arrestimi i pronarit u bë në Janinë dhe operacioni u përshpejtu, sepse autoritetet dyshonin se biznesmeni po përgatitej të largohej sërish nga vendi. I njëjti raportim citon deklaratën në ERT të presidentit nderi të punonjësve të policisë së Atikës juglindore, Giorgos Kalliakmanis, sipas të cilit numri i të akuzuarve mund të arrijë deri në 100.

Hetimi, i nisur sipas informacioneve që në janar të këtij viti, është ende në zhvillim dhe policia greke pritet të dalë me njoftime zyrtare pas përfundimit të operacionit. Akuzat janë në fazë hetimi dhe nuk përbëjnë vendim gjyqësor për çështjen e re.