Paketa e Maleve në Theth/ Ervin Demo: Një mundësi për të zhvilluar vendin prej nga vini

Ministër i Shtetit për Pushtetin Vendor, Ervin Demo ka deklaruar nga Thethi se Paketa e Maleve është një mundësi “për të zhvilluar vendin prej nga vjen secili prej jush”.

Ministri i Shtetit për Pushtetin Vendor, Ervin Demo, deklaroi se “Paketa e Maleve” është një mundësi reale për të zhvilluar vendin prej nga vjen secili.

“Tani në fakt edhe kryetari e përmendi me të drejtë, sot është një ditë shumë e rëndësishme për atë çfarë në fakt ne kemi muaj që punojmë për paketën e maleve. Ne vijmë atje në vendin ku paketa e maleve është konceptuar duke referuar problematikave që ka pasur zona”, u shpreh Demo.

Ministri theksoi se vetëm në raundin e parë të thirrjeve janë përzgjedhur 11 përfitues të parë, ndërsa procesi vazhdon edhe me aplikantët e tjerë që po trajtohen nga Bashkia Shkodër. Ai njoftoi se ditën e nesërme qeveria do të miratojë zonat e reja prioritare për këtë bashki.

Demo falënderoi të gjithë sipërmarrësit që besojnë te puna dhe te e drejta e pronësisë.

“Unë dua të falënderoj të gjithë ata të cilët besojnë te puna, besojnë tek e drejta e tyre mbi pronësinë, besojnë tek mundësia që ata kanë për të zhvilluar vendin nga ata vijnë. Dhe kjo është arsyeja që këtu sot, në fakt kaq shumë aplikantë të cilët besojnë te historia e suksesit që po ndodh në çdo cep të Shqipërisë”, nënvizoi ai.

Ai vuri në dukje se suksesi vjen nga mundi i sipërmarrësve dhe nga ndryshimet infrastrukturore që po bëhen në zonë, duke përmendur veçanërisht rrugën e Dukagjinit që do të lidhë Thethin me Tropojën, duke rritur fluksin e turistëve në veri të vendit.