Partia Fidesz e Orban: Prokuroria bastisi serverët dhe bazat tona të të dhënave

Partia Fidesz e ish-kryeministrit nacionalist të Hungarisë, Viktor Orban, e cila humbi pushtetin në zgjedhjet e prillit, deklaroi të martën se prokuroria ka ndërmarrë një kontroll në serverët e saj të të dhënave.

Që nga përfundimi i sundimit 16-vjeçar të Orbanit, kryeministri i ri proevropian dhe konservator, Peter Magyar, ka ndërmarrë hapa të shpejtë për të zbutur ndikimin që paraardhësi i tij vazhdon të ketë mbi shtetin hungarez.

“Hetuesit e prokurorisë u paraqitën pa paralajmërim në qendrën e të dhënave ku ndodhen serverët e Fidesz-it, me synimin për të sekuestruar të gjithë sistemin e komunikimit dhe bazat e të dhënave të partisë”, thuhet në një deklaratë të publikuar nga Fidesz në Facebook.

Partia pretendoi se “një veprim i tillë nuk ka ndodhur kurrë në Hungari që nga viti 1990, kur përfundoi regjimi komunist”.

Partia Tisza e Peter Magyar fitoi bindshëm zgjedhjet e prillit me premtimin për një “ndryshim regjimi” dhe një shkëputje të plotë nga epoka e Orbanit, duke siguruar një shumicë prej dy të tretash në parlament.

Qeveria e re ka vepruar me shpejtësi për të çmontuar ndikimin e ish-kryeministrit mbi institucionet shtetërore. Ajo ka miratuar një sërë masash kundër korrupsionit dhe ka ndryshuar Kushtetutën, duke e bërë praktikisht të pamundur që Viktor Orban të kandidojë sërish për postin e kryeministrit.

Nga ana tjetër, Fidesz i Orbanit i ka cilësuar vazhdimisht veprimet e qeverisë së Peter Magyar si “autokratike”, një akuzë që gjatë viteve të qeverisjes së tij i drejtohej shpesh vetë Viktor Orbanit.