Peleshi me përfaqësues të Komisionit të Venecias: Mirëpresim opinionin për ligjin e financimit të partive politike

Kryetari i Kuvendit, Niko Peleshi priti sot në një takim përfaqësues të Komisionit të Venecias, në kuadër të përgatitjes së opinionit për projektligjin mbi financimin e partive politike, pjesë e reformës zgjedhore.

Peleshi vlerësoi se “Komisioni i Venecias mbetet një partner i çmuar dhe i besueshëm i Kuvendit, ndërsa Shqipëria vlerësohet për zbatimin me korrektësi të rekomandimeve dhe opinioneve të tij”.

“Kuvendi mirëpret opinionin e Komisionit të Venecias për hartimin e një ligji që garanton transparencë, integritet në financimin politik, barazi në konkurrencën elektorale dhe forcim të mekanizmave të kontrollit financiar, mbi parimet e proporcionalitetit, mosdiskriminimit dhe sigurisë juridike’, u shpreh Peleshi.

Sipas tij, synimi është miratimi i këtij ligji me konsensus të gjerë politik, mes maxhorancës dhe opozitës.