Për më shumë se tre muaj Tetova është pa karrotrec
Mungesa e karrotrecit ka shtuar parkimet vend e pa vend, ndërsa policia ka shqiptuar rreth 2.500 gjoba nga janari e deri më sot; komuna thotë se mjeti është në riparim dhe do të rregullohet brenda javës.
Mungesa e karrotrecit, e njohur si “merimanga”, për më shumë se tre muaj në qytetin e Tetovës ka bërë që të shtohet numri i makinave që parkohen vend e pa vend, raporton Alsat. Sipas Sektorit të Punëve të Brendshme, për periudhën nga janari e deri ditën e sotme janë ndërmarrë rreth 2.500 masa ndaj shoferëve që kanë parkuar makinat gabimisht. Sipas policisë, mungesa e shërbimit të merimangës vështirëson punën në terren.
“Në kontrollet e rregullta dhe të intensifikuara, pjesëtarë të SPB-së dhe stacioneve të tjera kanë shqiptuar rreth 2.500 gjoba për llojet e ndryshme të keqparkimeve. Kryesisht problem i veçantë është edhe mungesa e mjetit special të merimangës, e cila e rëndon edhe më shumë punën në terren, por si sektor mundohemi t’i shfrytëzojmë rregullat e reja në komunikacion, ku gjatë regjistrimit të automjeteve është i detyrueshëm edhe numri i telefonit, me çka na ndihmon në gjetjen e personit që ka parkuar për afat më të gjatë makinën”, tha Fatmir Rexhepi, zëdhënës i SPB Tetovë.
Komuna e Tetovës mungesën e shërbimit të merimangës e arsyeton me defektin që ka automjeti i komunës. “Sipas informatave që morëm nga parkingu i qytetit, merimanga e ndërmarrjes është në riparim dhe na treguan se brenda javës do të rregullohet. Ndërsa na treguan se gjatë vitit të ardhshëm do të ketë plan për të siguruar edhe dy merimanga tjera që do të jenë në shërbim të qytetit”, deklaroi Besarta Ramadani, zëdhënëse e Komunës së Tetovës.
Si pasojë e makinave të parkuara, sidomos nëpër trotuare, kalimtarët janë të detyruar të ecin në mes të rrugës. Tetova ka pasur deri para rreth katër muajsh tre merimanga, dy nga të cilat ishin private, por që me koncesion ishin të angazhuara nga komuna; me skadimin e kontratës, qyteti mbeti pa asnjë, thekson Alsat.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.