“Përdorimi i dronëve, me leje”-Aviacioni Civil, draft-rregullore: Synohen qiej më të sigurt

Të gjithë personat që kanë në përdorim dronë do të duhet të pajisen me një leje të posaçme. Autoriteti i Aviacionit Civil është duke draftuar rregulloren për këto pajisje, e cila do të synojë rregullimin e këtij aktiviteti për qiej më të sigurt. Dokumenti është në fazë diskutimesh dhe ende nuk janë përcaktuar detajet që do të ndiqen, por referuar rregulloreve të Bashkimit Evropian, marrja e këtyre lejeve nuk njeh kufizim, por thjesht synon regjistrimin e personave që i kanë në përdorim këto pajisje.

Gjithashtu, rregulloret e BE-së përcaktojnë edhe vende, ku është i kufizuar përdorimi i dronëve sikurse mund të jenë aeroportet apo zona ushtarake. Pajisja me leje nuk parashikon tarifa aplikimi, çka sugjeron se ky proces do të jetë falas. Ndërkaq, duke marrë në konsideratë rregullimin e këtij aktivitetit në vendin tonë, Autoriteti i Aviacionit Civil do të ofrojë një kurs falas mbi konceptet bazë për mjetet e vogla të fluturimit.

Ai mundësohet nga një prej universiteteve, të Shteteve të Bashkuara të Amerikës nga data 22 janar deri në 4 shkurt dhe do të shpjegojë gjithçka përdoruesit e rinj duhet të dinë për të operuar në mënyrë të sigurt dronet e tyre. Pjesëmarrësit do të mësojnë në lidhje me pajisjet, hapësirën ajrore, kërkesat ligjore dhe veglat e planifikimit të fluturimit. Shqipëria është ndër të paktat vende në rajon, që nuk kanë ende një rregullore për përdorimin e këtyre pajisjeve.