Policia gjen anijen që u fundos gjatë javës në San Francisko, identifikohet trupi i viktmës

Policia zbuloi të premten varkën që u fundos këtë javë në Gjirin e San Franciskos, pasi nxori trupin e një personi të zhdukur një ditë më parë.

Trupi u identifikua si Tondra Madruga, 58 vjeç. Ajo ishte një nga tre personat e zhdukur pasi anija Volare, një anije me kabinë 15 metra e gjatë, u mbyt të mërkurën pasdite me 20 persona në bord, pasi u godit nga një valë dhe u përmbys. Grupi ishte në anije për të shpërndarë hirin e një të dashuri.

Njësia detare e departamentit të policisë së San Franciskos gjeti rrënojat e zhytura të anijes Volare në afërsi të vendit ku ajo u fundos. Besohej se varka ishte zhytur në shtratin shkëmbor të detit në ujë 36 metra të thellë.

“Familja jonë është e pikëlluar nga humbja e nënës, vajzës, motrës dhe tezes sonë të dashur, Tondra Madruga”, tha anëtari i familjes Quin Madruga në Facebook.

“Zemrat tona mbeten me çdo familje të prekur dhe ne e vlerësojmë sinqerisht mirësinë dhe mirëkuptimin tuaj.”

Një burrë, Clifford Boisa, vdiq menjëherë pasi u nxor nga uji i ftohtë. Roja Bregdetare e SHBA-së pezulloi përpjekjet e kërkimit të mërkurën në mbrëmje, por policia është ende në kërkim të dy personave të zhdukur.

Gjiri është i njohur për rrymat e tij të forta dhe brenda pak orësh nga fundosja e anijes, ekipet e shpëtimit po kërkonin edhe në oqeanin e hapur përtej Urës Golden Gate.