Policia nis hetimin për rastin e dy pacienteve pas aplikimit të botoksit: dyshohet preparat i falsifikuar

Oficerët e Departamentit të Sigurisë së Podgoricës kanë nisur hetimet pas një denoncimi telefonik të bërë nga një punonjës i Qendrës Klinike të Malit të Zi (KCCG), pasi dy paciente u paraqitën në spital pas një trajtimi kozmetik — gjoja aplikim i toksinës botulinike.

Drejtoria e Policisë njoftoi për hetimin një ditë pasi KCCG-ja bëri të ditur se dy pacientet ishin trajtuar dhe shtruar në spital, me dyshimin se gjatë trajtimit ishte përdorur një preparat i dëmtuar dhe i falsifikuar.

Ministria e Shëndetësisë tha se gjendja shëndetësore e pacienteve është aktualisht e qëndrueshme dhe se ato nuk janë në rrezik për jetën.

Policia ka njoftuar prokurorin shtetëror në Prokurorinë Themelore Shtetërore në Podgoricë dhe, në koordinim me të dhe me urdhër të tij, po ndërmerr të gjitha masat e nevojshme për zbardhjen e plotë të fakteve të rastit.

Ndërkohë, Instituti për Barnat dhe Pajisjet Mjekësore (CInMED) deklaroi se nuk ka të dhëna të konfirmuara për identitetin e saktë të preparatit, numrin e serisë, origjinën, mënyrën e prokurimit dhe kushtet e ruajtjes e aplikimit — prandaj, sipas institutit, nuk mund të pretendohet as se bëhet fjalë për Dysport-in e as për një bar të falsifikuar; këto rrethana duhen vërtetuar në procedurën hetimore.

Burimi: Vijesti