Policia përgënjeshtron deklaratën e Qani Kapllanit: Nuk ka patur të sëmurë në mjetin e tij

Policia e Shtetit hedh poshtë si të pavërteta deklarimet e shtetasit Qani Kapllani, gjatë prononcimit të dhënë në një media sot, i cili pretendonte se teksa ka transportuar një shtetase të vetëhelmuar është ndaluar nga shërbimet e Policisë Rrugore, duke i sjellë vonesa në transportimin e saj në drejtim të spitalit.

Policia e Shtetit sqaron opinionin publik se nga verifikimet e kryera rezulton se shtetasi denoncues ka gënjyer publikisht në lidhje me faktet e ndëshkimit të tij nga shërbimi i Policisë Rrugore.

Vajza e vetëhelmuar në orët e mëngjesit të datës 24.10.2014 është transportuar në spital nga Rrogozhina me anë të një mjeti autoambulancë dhe jo me mjetin e këtij shtetasi. Asnjë patrullë e Policisë Rrugore nuk e ka ndaluar ambulancën gjatë transportimit të vajzës së vetëhelmuar.

Shtetasi Qani Kapllani është ndaluar dhe kontrolluar gjatë drejtimit të mjetit me targë AA216CY, i cili është në pronësi të shtetasit B.Kapllani, për mospërdorim të sistemit të ndriçimit të mjetit të tij dhe për mospajisje të mjetit me policë sigurimi.

Ndalimi dhe ndëshkimi i tij ka ndodhur në orën 18:50 të mbrëmjes në unazën jugore të qytetit të Kavajës, e konfirmuar kjo nga sistemi E-GJOBA.

Strukturat e Policisë së Shtetit të Komisariati Kavajë po administrojnë provat dhe deklarimet e shtetasve dhe mësueses që ka transportuar nxënësen e vetëhelmuar për të dokumentuar të gjithë ngjarjen.

Ndërkohë po kryhen veprimet procedurale dhe ndaj shtetasit Qani Kapllani, lidhur me deklarimet e rreme të bëra prej tij ndaj strukturave të Policisë së Shtetit.