Pothuajse e kryer, lamtumira e Enzo Fernandez shumë afër! Mesfushori argjentinas arrin akordin me Manchester City

Enzo Fernandez është gjithnjë e më pranë një transferimi të bujshëm te Manchester City.

Mesfushori argjentinas ka arritur marrëveshje personale me klubin anglez, raporton gazetari i njohur i merkatos, Fabrizio Romano.

Sipas raportimeve, Fernandez dëshiron me çdo kusht të kompletojë transferimin te Manchester City dhe tashmë ka dhënë dritën jeshile për lëvizjen. Një nga arsyet kryesore është dëshira e tij për të punuar sërish me Enzo Marescan, me të cilin ka pasur më parë bashkëpunim.

Situata duket se është bërë edhe më konkrete te Chelsea. Fernandez pritet të mos jetë pjesë e skuadrës së “Blutë” për ndeshjen e kësaj fundjave ndaj Brighton & Hove Albion.

Megjithatë, Manchester City ende nuk ka nisur kontaktet zyrtare me Chelsean për transferimin e mesfushorit. Fabrizio Romano pret që këto kontakte të nisin shumë shpejt, ndërsa më pas pritet të fillojnë negociatat për një marrëveshje.

Transferimi nuk pritet të jetë aspak i lehtë për t’u realizuar. Chelsea investoi më shumë se 120 milionë euro për të transferuar Fernandez nga Benfica në vitin 2023, ndaj londinezët nuk pritet të pranojnë një ofertë të ulët për kampionin e botës me Argjentinën.