Presidenti çek akuzon BE-në për standarde të dyfishta
Presidenti çek deklaron para një vizite në Rusi, se BE-ja ka njohur ndarjen e Kosovës nga Serbia, kurse në rastin e Krimesë ndjek standarde të dyfishta.
Rreth tetë javë para zgjedhjeve presidenciale në Republikën Çeke, presidenti në detyrë Milos Zeman zhvillon një vizitë në Rusi. Në fillim të vizitës katërditore ai do të zhvillojë të martën një takim me shefin e Kremlinit, Vladimir Putin, në Soçi. 73-vjeçari Zeman konsiderohet sipas sondazheve si favorit për zgjedhjet presidenciale, raundi i parë i të cilave zhvillohet më 12 dhe 13 janar.
Zeman: Kritika ndaj BE-së për standarde të dyfishta
Qëllimi i vizitës është zgjerimi i marrëdhënieve ekonomike. Në një intervistë për mediat ruse Zeman tha se BE-ja nuk ka një udhëheqje të fortë ndryshe nga SHBA-ja, Rusia dhe Kina. Ai gjithashtu akuzoi BE për standardet e dyfishta në Krime, të cilën Rusia e pushtoi në vitin 2014 në kundërshtim me të drejtën ndërkombëtare.
Sipas Zeman në këtë rast, BE-ja përdor standarde të dyfishta kur nuk e njeh Krimenë, sepse BE-ja ka njohur ndarjen e Kosovës nga Serbia.
Zgjerimi i marrëdhënieve ekonomike çeko-ruse
Zeman shoqërohet gjatë vizitës së tij në Rusi nga më shumë se 120 përfaqësues të biznesit dhe të industrisë. Ai do të hapë përkatësisht një konferencë ekonomike në Moskë dhe një në Jekaterinburg. Përveç këtyre aktiviteteve në agjendën e vizitës parashikohen takime me kryeministrin Dmitri Medvedev dhe me kreun e fundit të shtetit të Bashkimit Sovjetik, Mikhail Gorbaçov.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.