Presidenti iranian: 6 miliardë dollarë të aseteve të ngrira në Katar do të kthehen

Presidenti iranian, Masoud Pezeshkian ka deklaruar se gjysma e aseteve të ngrira të Iranit që mbahen në Katar do të kthehen në Teheran. Pezeshkian këtë deklaratë e dha gjatë takimeve me klerikë të lartë iranianë në qytetin e Qomit.

“Bazuar në planet e bëra, 6 miliardë dollarë nga gjithsej 12 miliardë dollarë të burimeve të Iranit në Katar do të kthehen në vend, dhe po kryhen gjithashtu hetimet e nevojshme për kthimin e pjesës së mbetur të këtyre burimeve”, tha Pezeshkian.

Zyrtarët amerikanë kanë thënë se ende nuk janë liruar asetet e ngrira iraniane.

Një zyrtar amerikan tha të hënën në një deklaratë: “Asetet iraniane që lirohen do të përdoren për të blerë produkte bujqësore amerikane për të ushqyer popullin iranian. Çdo lirim fondesh për blerje humanitare do të lidhet me performancën dhe zbatimin e Memorandumit të Mirëkuptimit nga Irani.”

Memorandumi i mirëkuptimit i rënë dakord midis SHBA-së dhe Iranit në fillim të këtij muaji përcaktoi që Uashingtoni merr përsipër të vërë plotësisht në dispozicion për përdorim fondet dhe asetet e ngrira ose të kufizuara të Republikës Islamike të Iranit pas zbatimit të marrëveshjes.

Irani ka këmbëngulur prej kohësh në bisedime që kthimi i aseteve të ngrira në bankat e huaja duhet të jetë pjesë e procesit pas nënshkrimit të memorandumit.