Prva banka kërkon 7.000 euro nga drejtori i MANS-it: ‘Reputacioni u dëmtua’ pas reportazhit për aksionarin Aco Đukanoviq

Dejan Milovac, drejtor i Qendrës Hulumtuese të MANS-it (Foto: MANS/Vijesti)

Një seancë e re është mbajtur dje në Gjykatën Themelore të Podgoricës në procesin gjyqësor që Prva banka ka nisur kundër Dejan Milovacit, drejtorit të Qendrës Hulumtuese të MANS-it, për dëmtim të reputacionit. Banka kërkon 7.000 euro dëmshpërblim. Në seancën e djeshme u shqyrtua reportazhi i transmetuar më 3 mars në emisionin “Vijesti u pola 7” të TV Vijesti.

Në seancë dëshmoi Bojana Vešović, drejtoreshë ekzekutive e Prva bankës për burime njerëzore, marketing dhe komunikim. Sipas saj, pas transmetimit të reportazhit klientët kontaktuan bankën duke pyetur nëse depozitat e tyre ishin të sigurta dhe pati edhe tërheqje parash, ndërsa punonjësit u frikësuan për vendet e punës dhe pagat. Vešović pohoi se një pasiguri “në masë më të vogël vazhdon edhe sot”, por theksoi se situata u qetësua falë padive. Megjithatë, ajo nuk mundi të përmendte asnjë person konkret që kishte tërhequr para pas reportazhit.

Reportazhi kishte të bënte me arrestimin e aksionarit shumicë të bankës, Aco Đukanoviqit, vëllait të ish-presidentit dhe ish-kryeministrit malazez. Në material përmendeshin bizneset e tij të mëparshme, Prva banka si dhe hetimet e MANS-it dhe të rrjetit ndërkombëtar të gazetarëve hetues OCCRP. Po ashtu përmendej dyshimi se Prva banka kishte qenë “lavatriçe” e parave të pista të të akuzuarve për krime të rënda, si Darko Šarić.

Milovac dëshmoi se nuk i kishte thënë gazetarit Predrag Tomović se banka ishte “lavatriçe e parave të pista”. Sipas tij, me gazetarin kishin folur për dyshime që buronin nga hetimet, ndërsa formulimi për “lavatriçen” ishte thënë nga gazetari në “off”, jo nga ai. Avokati i tij, Siniša Gazivoda, vuri në dukje se në reportazh flitet për dyshime, jo për fakte të provuara, dhe se MANS e konsideron padinë një padi SLAPP – përpjekje për të dekurajuar përmes gjyqit hulumtuesit që flasin për çështje me interes publik. Nga ana tjetër, avokatja e bankës, Sanja Lugonja, tha se Milovac me dëshminë e tij “praktikisht e pranoi kërkesëpadinë”, duke u përpjekur ta relativizojë përmbajtjen e reportazhit.

Konteksti: pas aksionit policor të 27 shkurtit ndaj Đukanoviqit, Prva banka nisi një seri padish kundër disa personave dhe mediave për deklarata rreth bankës dhe aksionarit të saj më të madh: gazetares Vesna Radojević, drejtores ekzekutive të Aksionit për Drejtësi Sociale Ines Mrdović, zyrtarit të DNP-së Milun Zogović dhe RTV Podgorica. Përveç këtyre, banka paditi edhe shtetin e Malit të Zi, duke kërkuar 6 milionë euro dëmshpërblim për aksionin policor të 27 shkurtit, me pretendimin se pas aksionit pasoi një dalje prej gati 8,5 milionë euro depozitash.

Burimi: Vijesti