Djali nga Ulqini mbërrin në Vjenë përmes përrallës: ‘Aleni dhe llamba magjike’ premierë sot në Vienna Design Week

Ekspozita interaktive TECH TALES hapet sot premierë në kuadër të Vienna Design Week – Javës së Dizajnit të Vjenës, një nga ngjarjet ndërkombëtare më të rëndësishme kushtuar dizajnit bashkëkohor dhe praktikave kreative. Mes tre historive që vizitorët do të njohin përmes kësaj ekspozite novatore është edhe historia e Alenit, heroit të përrallës “Alen i čarobna lampa” të autorit malazez Miroslav Minić.

Aleni është djalë nga Ulqini që nuk dëshiron të bëhet futbollist, por ëndërron të bëhet stilist mode. Në rrugën drejt realizimit të ëndrrës gjen një mik, dhe historia e tyre bëhet një rrëfim për lirinë për të qenë vetvetja, e jo ajo që të tjerët presin. Frymëzuar nga përralla klasike persiane “Aladini dhe llamba magjike”, historia përmes perspektivës bashkëkohore të fëmijëve hap çështje të stereotipeve gjinore dhe maskulinitetit toksik, veçanërisht në shoqëri ku modelet patriarkale janë ende fort të pranishme.

TECH TALES është një ekspozitë interaktive dhe imersive që nuk i vendos fëmijët thjesht në rolin e publikut, por i fut drejtpërdrejt në botën e historisë: përmes rrëfimit, animacionit, lojës, lëvizjes, vizatimit dhe eksplorimit. Në momente të caktuara heronjtë kanë nevojë për ndihmë dhe fëmijët bëhen pjesëmarrës aktivë të aventurave të tyre. Ekspozita ka edhe një hapësirë të veçantë për emocionet, ku fëmijët mund të krijojnë historitë e tyre dhe të mësojnë ushtrime të thjeshta frymëmarrjeje.

Ekspozita është pjesë e projektit evropian TECH(ing) TALES WITH A TWIST, që heton dhunën e bazuar në stigmë përmes ripërpunimit krijues të përrallave klasike. Projekti mbledh shtatë partnerë nga Evropa: Institutin për Dizajn Transmedial dhe Art Rebel 9 (Slloveni), Vienna Design Office (Austri), NVU FLUX (Mali i Zi), ART TRANSPARENT (Poloni), IAAC-FabLab Barcelona (Spanjë) dhe “Hajde da…” (Serbi). Projekti financohet nga Bashkimi Evropian në kuadër të programit Kreativna Evropa; zbatimin në Mal të Zi e bën NVU FLUX, bashkëfinancuar nga Qeveria e Malit të Zi. Versioni origjinal i përrallës rrëfehet nga aktori Lazar Đurđević (edhe në anglisht), versioni slloven nga Matej Končan, ai serb nga Miloš Anđelković; ilustrimet janë të Tom Schirdewahn.

Burimi: Vijesti