Qendra Filmike e Malit të Zi ndan 1,3 milion euro për 22 projekte, më shumë marrin Vojvodiqi dhe Salatiqi

Qendra Filmike e Malit të Zi do të bashkëfinancojë 22 projekte kinematografike në konkursin për vitin 2026, me një shumë të përgjithshme prej 1.302.000 eurosh, siç njofton Portal Analitika. Fondet u ndanë në katër kategori, sipas propozimit të konsulentëve profesionalë dhe vendimit të Këshillit të marrë në mbledhjen e 14 tetorit.

Në kategorinë e filmave artistikë të gjatë u mbështetën vetëm dy nga 15 projektet e paraqitura, me gjithsej 632.000 euro: “Po meni se ništa neće zvati” i regjisorit Gjorgje Vojvodiq, i kompanisë Bitter Frames Production, mori 332.000 euro, ndërsa “Mjesto nakon tame” i Ivan Salatiqit, i kompanisë Meander Film, mori 300.000 euro, raporton Portal Analitika.

Për filmat në prodhim u ndanë 170.000 euro për shtatë projekte, mes tyre “Sobe” e Pavle Simonoviqit, “Kontraadmiral” i Mladen Ivanoviqit dhe “Požari” e Nina Tratnikut. Katër dokumentarë të gjatë u mbështetën me 130.000 euro, përfshirë “Il Genio” të Ivan Marinoviqit dhe biografinë filmike për regjisorin Velko Bulajiq nga Branko Baletiq.

Kategoria më e gjerë ishte ajo e bashkëprodhimeve minoritare: nëntë projekte nga 41 të paraqitura u mbështetën me 370.000 euro. Mes tyre është edhe “Hladno sunce” (“Diell i ftohtë”) i regjisorit shqiptar Gentian Koçi nga Shqipëria, si dhe projekte nga Sllovenia, Kroacia, Qipro, Turqia, Greqia dhe Maqedonia e Veriut.

Qendra Filmike do të lidhë kontrata të veçanta me përfituesit, ku do të përcaktohen të drejtat dhe detyrimet, dinamika e pagesave dhe mënyra e përdorimit të fondeve.