Qeveria serbe, mbledhje të jashtëzakonshme pas lirimit të Haradinajt

Qeveria e Serbisë ka caktuar një mbledhje të jashtëzakonshme për shkak të lirimit të ish-kryeministrit të Kosovës, Ramush Haradinaj, pasi kërkesa e Serbisë për ekstradim në Beograd u refuzua.
Në shtypin e Serbisë, ku pritej të ekstradohej kreu i Aleancës për Ardhmërinë e Kosovës, shkruhet se “krimineli është në liri” dhe flitet për “një vendim të turpshëm të gjykatës së Francës për lirimin e vrasësit të serbëve”.

Dy prej mediumeve serbe më të vizituara, Blic dhe Telegraf, nuk e kane fshehur nervozën e tyre për lirimin e ish-komandatit të UÇK-së, Ramush Haradinaj, nga Gjykata franceze në Colmar. Mediumi tjetër mjaft i vizituar, portali B92, duket të jetë më i rezervuar në akuza. Ky portal bën raportim thjeshtë gazetaresk pa hyrë në komente dhe akuza. Portali Blic, lajmin për lirimin e Haradinajt, e titullon “Krimineli në liri”. Më tutje raporton për tërë procesin ndaj Haradinajt në Francë. Portali tjeter nga Serbia, Telegraf, raporton me titull: “Fjalët e para të Haradinajt pas ‘lirimit skandaloz’ nuk kanë mundur të jenë më shumë provokative”. Telegraf kishte raportuar edhe në momentet e para të lajmit për lirimin e Haradinajt me titull: “Krimineli në liri: Vendimi i turpshëm i Gjykatës franceze, brohoritje “UÇK” para Gjykatës”

Ministria e Drejtësisë në Serbi tha se kishte fakte të reja për rastin Haradinaj, pavarësisht se ai ishte liruar dy herë nga Gjykata e Hagës. Pas këtij vendimi, pritet që qeveria të ketë një reagim, por autoritetet serbe nuk kanë të drejtë ankimimi në vendimin e Gjykatës së Kolmarit.