Rama me fituesit e startup-eve 2025: Rrisim volumin e financimeve për aplikantët – Tv Klan

Kryeministri Edi Rama takim me vajza e djem të talentuar, fitues të programit të startup-eve për vitin 2025 dhe aplikantë për vitin 2026, me projekte premtuese në fushën e teknologjisë.

Aktualisht në vendin tonë ka arritur në 3 mijë e 300 numri i kompanive të regjistruara, me mbi 21 mijë specialistë që punojnë në këtë sektor, ndërkohë që paralelisht është rritur me 15% edhe numri i  studentëve të regjistruar në degët që kanë të bëjnë me teknologjinë digjitale.

“Ishte kënaqësi që të ishim këtu edhe të mund të shihnim çfarë keni bërë, ndërkohë që për më shumë se kaq ky takim vlen që edhe të tjerët të shohin mundësitë, se çfarë bëjmë së bashku. Forca e teknologjisë i jep mundësinë njeriut që të realizojë të paimagjinueshmen. Ne sot mund të themi lirisht, atë që deri disa kohë më parë ishte për të qeshur.

Cilido dhe cilado nga të rinjtë në Shqipëri, mund të punojnë nga Shqipëria në çdo vend të botës, mjafton që të kenë një kompjuter dhe të jenë të lidhur me internetin. Të punojnë nga shtëpia e tyre dhe të paguhen çdo herë më mirë nga sa do punonin nëse do largoheshin nga Shqipëria. Nuk është më për të qeshur, por është një realitet. Një shifër për ne është shumë domethënëse, 3-fishimi i aplikantëve të programeve tona të startup-eve. Tashmë është një program i besueshëm.

Ka tërhequr një numër rekord aplikimesh 1219 aplikime, për mbështetje financiare që shkon nga 15 mijë euro në 45 mijë euro dhe për projekte konsolidimi deri në 90 mijë euro. Nuk janë kredi, por janë grante që qeveria shqiptare ua vë në dispozicion atyre që paraqiten me një ode interesante. Jemi sot në Elbasan dhe ky qytet ka edhe një potencial tjetër, ka shkollën e vet profesionale dhe vetvetiu përbën një rezervuar mjaft të konsiderueshëm si qyteti i Elbasanit për të rritur krijesa të reja të botës së teknologjisë.

Kemi nxjerrë një mësim nga kjo rritje e numrit të aplikimeve, për t’iu përgjigjur kësaj shpejtësie ne do rrisim edhe volumin e financimeve. Për të gjithë ata që kanë aplikuar, ne nuk do të kufizohemi tek numri i fituesve, por do të bëjmë një ekstra financim në javët që vijnë. Do të financojmë edhe aplikues të tjerë mbi atë shifër. Duke u mundur që ta rrisim financimin aq sa është rritur numri, në proporcion. Këtu në Elbasan kemi 27 shkolla, që kanë laboratorët inteligjentë”, tha kryeministri Rama.

Lajmi në përditësim…

/tvklan.al