Rama në Shkup: Procesi i Berlinit rol kyç në fazën e re të marrëdhënieve me BE-në

Kryeministri Edi Rama nënvizoi sot rolin kyç që ka Procesi i Berlinit, ndërkohë që sipas tij, “jemi në momentin e kapërcimit në një fazë tjetër të marrëdhënieve me Bashkimin Europian”.

Në konferencën e përbashkët për shtyp në Shkup me kryeministrin e Maqedonisë së Veriut, Dimitar Kovaçevski, Rama tha se “ne duhet të zhytemi me mendje dhe me zemër në Procesin e Berlinit”.

“Kjo për ta kthyer Procesin e Berlinit në një proces funksional, plotësisht, siç Ballkani i Hapur provoi se ne mund të jemi funksionalë kur jemi së bashku. Procesi i Berlinit nuk ngeci nga ata që ngritën Ballkanin e Hapur, që të jemi shumë të qartë. Ngeci nga vetot ‘Jo nuk dua këtë, nuk vij aty, nuk firmos, nuk jam, shikohemi nesër’. Për këtë ngeci”, tha Rama.

Kryeministri theksoi se shpreson që tani t’i jepet një shtysë e re, duke pasur parasysh që tani nuk është thjesht një proces si deri më sot.

“Shpresoj shumë që ta kthejmë në një proces të lidhur drejtpërdrejtë me planin e financimeve, planin e ri të financimeve të Bashkimit Europian, për të cilin na duhet Gjermania patjetër, në radhë të parë dhe pastaj gjithë vendet e tjera për ta jetësuar bashkërisht”, tha ai.

Rama theksoi se “jemi në një moment të një kapërcimi në një fazë tjetër të marrëdhënieve me Bashkimin Europian dhe për këtë, Procesi i Berlinit është kyç, është një urë që këmbët e të cilës duhen forcuar”.

“Pikërisht që ne të merremi fort dhe të fokusohemi tek kjo urë pa u shqetësuar nga këto erërat, korentet, kundërkorentet, Ballkani i Hapur, kjo e ajo, unë them duhet të fokusohemi tek Procesi i Berlinit. Kjo është e gjitha”, tha Rama.

“Unë shpresoj se Kuvendi jonë do të jetë në nivel të detyrës dhe që më në fund do të mundemi me hapa të përshpejtuar ta vazhdojmë rrugën tonë në integrimin evropian. E di se nuk do të jetë e lehtë për shkak se ekzistojnë interesa të ndryshme dhe kalkulime të ndryshme nga të gjitha partitë politike. Një pjesë e tyre shohin interesat e shtetit por një pjesë e liderëve politik shohin vetëm interesin e tyre politik por duhet të sillet vendim që do të jetë i guximshëm”, tha Dimitar Kovaçevski, kryeministër.

E deri në anëtarësimin e plotë, Kovaçevski dhe Rama paralajmëruan një plan të përbashkët me Komisionin Evropian, që vendet e Ballkanit Perëndimor të cilat nuk janë akoma anëtare, të mund të përfitojnë më shumë nga unioni, para anëtarësimit. Një takim për këtë çështje, Rama e paralajmëroi të ndodhë së shpejti në Tiranë.