Raporti i BERZH: Vajzat shqiptare kalojnë djemtë në rezultatet e larta në matematikë

Për vite me radhë, matematika është konsideruar si një fushë ku djemtë kanë më shumë prirje dhe sukses. Por të dhënat më të fundit tregojnë se ky perceptim po zbehet gjithnjë e më shumë, të paktën në Shqipëri.

Një analizë e publikuar në raportin e fundit të BERZH-it, e bazuar në rezultatet e testimit ndërkombëtar PISA 2022, tregon se Shqipëria renditet mes vendeve me përfaqësimin më të lartë të vajzave në grupin e nxënësve më të talentuar në matematikë.

Rreth 40% e nxënësve me rezultatet më të larta janë vajza, një tregues që sfidon bindjet tradicionale mbi dallimet gjinore në lëndët ekzakte.

Vajzat, tregon raporti, kalojnë më shumë kohë duke kryer ushtrime, duke marrë pjesë në konkurse dhe olimpiada shkencore.

Aftësitë në matematikë lidhen ngushtë me profesionet e së ardhmes, nga teknologjia dhe inteligjenca artificiale te inxhinieria, financat dhe kërkimi shkencor.

Megjithatë, sfida nuk mbaron me rezultatet në bankat e shkollës. Shumë vajza që shkëlqejnë në matematikë dhe shkenca përballen më pas me zgjedhje të vështira për studimet, karrierën apo emigrimin.

Në një shoqëri ku ende ekzistojnë paragjykime për profesionet “e vajzave” dhe “të djemve”, këto rezultate tregojnë se aftësia nuk ka gjini.

Kjo e bën edhe më të rëndësishme krijimin e mundësive që talenti i tyre të zhvillohet dhe të kontribuojë brenda vendit.