Regjistri i bizneseve numëron 250 mijë njësi në vitin 2025, gati gjysma fermerë

Bizneset ligjore në Shqipëri ka shënuar rritje 5% krahasuar me vitin e kaluar. Sipas profilit, nga 250 mijë gjithsej, afro gjysma e tyre janë fermerë.

Bizneset ligjore në Shqipëri ka shënuar rritje 5% krahasuar me vitin e kaluar, duke arritur në një total prej 250 100 njësish aktive në fund të vitit 2025.

Zgjerimi ka ardhur si rezultat i rritjes së numrit të fermerëve aktivë, të cilët arritën në 112.200 me shtim 6%, si dhe të ndërmarrjeve ekonomike aktive që u rritën me 4%, duke prekur shifrën 137 900.

Gjatë këtij viti u regjistruan 18.300 ndërmarrje të reja, duke shënuar ecuri më të lartë se viti 2024 ku ishin regjistruar 16 000 të tilla. Po ashtu, edhe regjistri i njësive lokale u zgjerua me 4%, duke numëruar 146.500 njësi aktive.

Pjesa dërrmuese e ndërmarrjeve aktive në vend, saktësisht 86% e tyre, operojnë në grupin e prodhuesve të shërbimeve si tregtia, transporti, akomodimi apo informacioni, duke realizuar edhe pjesën më të madhe të shitjeve neto me 68%.

Nga ana tjetër, grupi i prodhuesve të të mirave, ku përfshihen bujqësia, industria dhe ndërtimi, përbën 14% të ndërmarrjeve dhe gjeneron 32% të shitjeve neto. Sa i përket profilit të pronësisë dhe menaxhimit, ndërmarrjet me pronarë të huaj ose bashkëpronarë zënë 5% të totalit dhe sigurojnë punësim për 13% të të punësuarve gjithsej në vend.

Një zhvillim pozitiv vihet re edhe në përfaqësimin gjinor, ku gratë menaxhojnë ose zotërojnë 32% të ndërmarrjeve aktive gjithsej, një rritje e lehtë kjo krahasuar me 31% që ishte në vitin 2024.

Pjesëmarrja më e lartë e grave në vendimmarrje është regjistruar në aktivitetet e shërbimeve të tjera me 41% dhe në tregti me 34%, ku kryesisht bëhet fjalë për biznese të vogla me 1 deri në 4 të punësuar.

Ndërkohë, sa i përket ndikimit ekonomik sipas madhësisë së bizneseve, ndërmarrjet e mëdha me 50 e më shumë të punësuar, ndonëse përfaqësojnë vetëm 2% të numrit total të ndërmarrjeve në Shqipëri, kanë një peshë kritike në ekonomi pasi punësojnë pothuajse gjysmën e fuqisë punëtore me 49% dhe realizojnë 45% të të gjithë volumit vjetor të shitjeve.