Review-t negative, 15 denoncime në Polici nga pronarët e bizneseve, mbi 200 autorë të identifikuar

15 denoncime janë bërë deri tani nga pronarët e bizneseve pranë sektorit të Krimit Kibernetik në lidhje me review-t negative ndaj bizneseve të ndryshme.

Policia ka identifikuar më shumë se 200 persona që dyshohet se kanë përdorur llogaritë e tyre të rregullta në rrjetet sociale për të publikuar ose shpërndarë vlerësime negative ndaj bizneseve.

Sipas burimeve, hetuesit po shqyrtojnë disa vepra të mundshme penale, mes tyre “manipulimi i çmimeve”, “përhapja e informacioneve të rreme”, “shpifja” dhe “falsifikimi kompjuterik”.

Policia thotë se qëllimi i hetimeve është identifikimi i personave që dyshohet se kanë organizuar dhe koordinuar fushatën e vlerësimeve negative, e cila ka shkaktuar dëme të konsiderueshme në imazhin dhe aktivitetin ekonomik të bizneseve të prekura.