Rikthehen Woody dhe Jessie

Yjet e Hollywood-it, Tom Hanks dhe Tim Allen, janë ribashkuar në tapetin e kuq të premierës britanike të Toy Story 5 në Londër, duke rikthyer emocionet e një prej filmave më të dashur të animuar për publikun në mbarë botën.

Dy aktorët legjendarë, që prej dekadash i japin zërin personazheve ikonë Woody dhe Buzz Lightyear, u pritën me entuziazëm nga fansat dhe mediat ndërkombëtare.

Në premierë mori pjesë edhe aktorja Joan Cusack, zëri i personazhit Jessie, në daljen e saj të parë në një tapet të kuq pas më shumë se një dekade.

Rikthimi i kastit origjinal është cilësuar si një moment nostalgjik për brezat që janë rritur me sagën “Toy Story”.

Filmi i ri pritet të sjellë një histori më emocionale dhe moderne, ku lodrat përballen me sfidën e teknologjisë dhe varësisë së fëmijëve ndaj pajisjeve elektronike.

Vetë Tom Hanks ka paralajmëruar se “Toy Story 5” do të përmbajë një nga skenat më prekëse të gjithë serisë.

Pixar dhe Disney kanë konfirmuar se filmi do të dalë në kinema më 19 qershor 2026, ndërsa pritshmëritë e publikut mbeten shumë të larta për rikthimin e aventurave të Woody dhe Buzz.

/tvklan.al